Por E.P. | Santiago de Compostela | 04/06/2022 | Actualizada ás 18:03
O presidente da Xunta e líder do PPdeG, Alfonso Rueda, esixiu, despois de transcender na pasada xornada a activación do protocolo antiacoso no Concello de Ourense por mor dunha denuncia interna ante Recursos Humanos da xefa da Policía Local, "máximo respecto aos funcionarios da Administración local, estean no posto que estean".
"Decateime da denuncia a través dos medios de comunicación e dígoo en xeral e dígoo como funcionario da Administración Local, creo que hai que esixir máximo respecto, iso o primeiro sen coñecer os detalles deste caso en concreto", dixo.
Preguntado sobre se a situación provoca un cambio da opinión do Partido Popular respecto de manter a Gonzalo Pérez Jácome á fronte da Alcaldía, Alfonso Rueda insistiu en que o grupo municipal "ten capacidade de autonomía para tomar as decisións que procedan".
"Volvo insistir en que no seu momento o Partido Popular de Galicia fixo unha proposta que segue vixente: que goberne a lista máis votada", lembrou o mandatario galego, quen lembrou que, se "esta proposta se tivese posto en práctica ao principio do actual mandato, que agora está a piques de rematar, "moitas cousas cambiarían en Ourense e noutros tantos sitios".
Así as cousas, ás portas dos comicios locais de 2022, dixo que "volve realizar a proposta" e que espera que "sexa acollida" para que se poida "deixar de predicar unha cousa e despois facer outra distinta".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.