O Goberno central apoia a instalación en Ferrol dunha planta de ensamblaxe de estruturas eólicas
É un proxecto de Nervión Naval Offshore para o porto exterior de Caneliñas.
Por E.P. | Ferrol | 06/06/2022 | Actualizada ás 18:51
O alcalde de Ferrol, Ángel Mato (PSOE), asegurou que "o Goberno central mostra o seu apoio ao proxecto de Nervión Naval Offshore para instalar en Ferrol unha planta de ensamblaxe de estruturas de eólica mariña". Así se pronunciou ao finalizar a reunión que mantivo en Madrid co secretario xeral de Industria e da PEME, Raül Blanco; o vicepresidente de Nervión e responsable máximo da división industrial do Grupo Amper, Alfonso Sánchez; e o director xeral de Nervión Naval Offshore, Roberto Bouza, onde presentaron esta iniciativa.
Segundo Mato, "o Goberno central ten un compromiso total coa diversificación do sector naval" e esta proposta "encaixa perfectamente no Perte para a industria naval".
O rexedor remarca que "o Goberno é moi consciente" da importancia do sector naval e da "necesidade da súa diversificación", polo que este proxecto de Nervión "é moi interesante para Madrid".
Segundo o proxecto de Nervión, a materialización desta iniciativa suporía crear uns 300 postos de traballo, que se realizaría no porto exterior de Ferrol, nunhas instalacións que ocuparían 74.000 metros cadrados e tras un investimento de 25 millóns de euros.
