Rueda solicita ao Goberno central o seu "compromiso" para materializar iniciativas en Galicia cos fondos europeos
Por E.P. | Santiago de Compostela | 07/06/2022 | Actualizada ás 16:16
O presidente da Xunta, Alfonso Rueda, espera que o Goberno estatal demostre o seu compromiso con Galicia a través dos fondos Next Generation para a materialización das iniciativas do Polo para a Transformación de Galicia, dirixidas ao sector empresarial galego.
O dirixente do Executivo galego reuniuse este martes co comité técnico da sociedade Impulsa, na que se avaliaron os principais proxectos nos que a Xunta está xa traballando para captar fondos europeos Next Generation.
Durante o encontro Rueda puxo de manifesto que as diferentes propostas incluída no Polo teñen un "carácter estratéxico e unha gran capacidade de tracción" sobre o tecido empresarial galego, o que "asegura o crecemento, o emprego e a competitividade".
Así, dentro do Polo para a Transformación de Galicia impulsado pola Xunta coa axuda da sociedade Impulsa, inclúense proxectos como o da fábrica de fibras téxtiles sustentables de Altri, que suporá un investimento de 800 millóns de euros e creará preto de 2.500 empregos.
Desta forma, a Xunta de Galicia móstrase "á espera" de que o presidente do Goberno, Pedro Sánchez, atenda a petición de reunión solicitada por Rueda para "axilizar e descentralizar os fondos europeos".
