Crecen as rupturas matrimoniais tras superarse os momentos duros da Covid

Galicia rexistrou 1.381 rupturas matrimoniais no primeiro trimestre de 2022, un 5% máis que no mesmo período de 2021.

Por Europa Press / Redacción | SANTIAGO DE COMPOSTELA | 08/06/2022 | Actualizada ás 10:47

Comparte esta noticia

O número de demandas de ruptura matrimonial aumentou en Galicia un 5,3% respecto ao mesmo período --primeiro trimestre-- de 2021. Así, segundo informa o Tribunal Superior de Xustiza de Galicia (TSXG), as solicitudes chegaron ás 1.381 fronte ás 1.311 do ano pasado.

O informe do TSXG apunta ademais a que no conxunto do Estado as cifras mantivéronse moi similares -- apenas un 0,5% menos que as notificadas hai un ano--. Con todo, se se pon en relación as demandas de ruptura matrimonial coa poboación a 1 de xaneiro de 2021, por cada 100.000 habitantes en Galicia contabilizáronse, no período estudado, 51 demandas, fronte ás 53,3 de media estatal.

Máis pormenorizadamente, en Galicia aumentaron un 5% os divorcios consensuados (de 755 a 793) e un 2,7% o non consensuados (de515 a 529). En relación coas separacións consensuadas, pasaron de 31 a 36 no primeiro trimestre do ano, mentres que as non consensuadas duplicáronse, ao pasar de 10 a 20. Neste período rexistráronse tres peticións de nulidade matrimonial.

Entre o 1 de xaneiro e o 31 de marzo iniciáronse 190 procedementos de modificación de medidas consensuadas, un 18,8% máis que no mesmo periodo do ano anterior. As demandas de modificación de medidas non consensuadas pasaron de 436 a 475, un 8,9 % máis.

En canto aos procedementos de garda, custodia e alimentos de fillos non matrimoniais, rexistráronse 267 demandas de modificación de medidas consensuadas, fronte ás 310 do primeiro trimestre de 2021, o que supón un descenso do 13,9%; e 300 demandas de modificación de medidas non consensuadas (343 o ano pasado), o que representa unha baixada interanual do 12,5%.

Sinatura de divorcios e separacións
Sinatura de divorcios e separacións | Fonte: EP

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta