Galicia supera xa os 100.000 peregrinos "oficiais"
Son os que recibiron ata agora a "compostela". Crecen un 17% con respecto a 2019.
Por Europa Press / Redacción | SANTIAGO DE COMPOSTELA | 08/06/2022 | Actualizada ás 12:53
O Camiño de Santiago recuperou xa datos de afluencia de peregrinos e supera en cifras aos últimos rexistros prepandemia, os de 2019. En concreto, máis de 100.000 peregrinos recolleron xa a súa Compostela, ao redor dun 17% máis que os daquel ano.
Segundo explicou este mércores a directora de Turismo de Galicia, Nava Castro, a Oficina do Peregrino expediu xa máis de 105.000 compostelas. A 1 de xuño de 2019, segundo os datos desta mesma oficina, entregáronse 89.639.
No entanto, Nava Castro lembrou que o volume real de peregrinos no Camiño é superior ao de compostelas retiradas, xa que hai entre un 30 e un 50 por cento de camiñantes que non solicitan este documento por distintas razóns --non o realizan por motivos relixiosos, xa o fixeron noutras ocasións, etc.--.
Xa os alcaldes do Camiño sinalaran á Xunta, con datos de gasto de auga ou recollida de lixos, que o exceso de peregrinos sobre as compostelas expedidas roldaba o 30 por cento, explicou Nava Castro. Agora, un proxecto piloto con sensores no Camiño Francés, entre Sarria e O Pino, apunta a que podería chegar ao 50 por cento máis.
A directora de Turismo explicou que, ademais do Camiño, o turismo en xeral en Galicia xa está a superar os datos de 2019, con cifras de máis dun millón de visitantes. Co obxectivo de que "todos os que se achegue a Galicia teña onde durmir", Castro avanzou que a Xunta prepara un proxecto que presentará en breve.
