Comesaña insiste en que o problema da sanidade pública "non é cuestión de pór diñeiro, senón de formar especialistas"

O conselleiro de Sanidade, Julio García Comesaña, insistiu en que o problema da sanidade pública "non é cuestión de pór diñeiro, senón de formar especialistas" e puntualizou que quen ten a capacidade de formar estes profesionais son as unidades docentes que están reguladas polo Ministerio de Sanidade "que desde o ano 2018 leva sen dar ningún paso neste sentido".

Comesaña fixo estas declaracións antes da súa participación na xornada de actualización do Programa Galego de Atención ao Infarto de Miocardio a preguntas dos xornalistas sobre a petición realizada polo secretario xeral do PSdeG, Valentín González Formoso, ao presidente da Xunta, Alfonso Rueda, de que asigne "140 millóns de euros adicionais" nos próximos orzamentos para "equiparar o investimento en atención primaria de Galicia co resto do Estado".

Segundo argumentou o conselleiro, o problema que existe na sanidade, "na estatal e en particular na galega", é que non hai médicos especialistas formados e por este motivo "falar de investir 140 millóns de euros para contratar non se sabe moi ben a quen é canto menos arriscado".

"Falar de colapso en Atención Primaria é unha cuestión dunha gravidade importante", apostilou Comesaña e lembrou que este martes 14 de xuño haberá unha comparecencia no Parlamento galego "para falar deste tema".