Por E.P. | SANTIAGO DE COMPOSTELA | 15/06/2022 | Actualizada ás 12:44
O Parlamento de Galicia emitiu unha declaración institucional na que di "compartir" coa Unión Europea o obxectivo do desenvolvemento dunha intelixencia artificial "centrada no ser humano e coherente cos dereitos fundamentais".
Por iso, a Cámara galega convida as administracións públicas, as universidades e o resto de axentes do coñecemento, aos sectores produtivos, aos axentes sociais e á sociedade a "participar dunha maneira activa e facer achegas para o debate sobre o marco ético e normativo" no que se debe aplicar estas tecnoloxías.
Segundo destaca o texto, lido este mércores no pleno polo presidente do Parlamento, Miguel Santalices, en base a un acordo unánime entre os tres grupos --PP, BNG e PSdeG--, as tecnoloxías intelixentes son "un conxunto de tecnoloxías de rápida evolución que poden xerar un amplo abanico de beneficios económicos e sociais en todos os sectores e actividades".
Dentro delas, engade a declaración institucional a intelixencia artificial "pode facilitar a consecución de resultados positivos desde un punto de vista social e ambiental, así como proporcionar vantaxes competitivas esenciais ás empresas e á economía, especialmente en sectores de alto impacto como o cambio climático, o medio ambiente e a saúde, o sector público, as finanzas, a mobilidade e a agricultura".
Con todo, estas novas posibilidades que ofrecen sacan á luz cuestións "non resoltas ata o momento", especialmente no tocante cos "marcos éticos e normativos que garantan a fiabilidade, a seguridade e os dereitos fundamentais da cidadanía". Neste contexto, a declaración institucional mostra o apoio do Parlamento a que a UE lidere unha formulación do uso da intelixencia artificial "baseada na ética, nos valores fundamentais dos dereitos humanos e nos principios democráticos".
Ademais, o texto destaca que a Estratexia Galega de Intelixencia Artificial elaborada pola Xunta que establece a folla de ruta para "conseguir unha 'Galicia intelixente' na próxima década que contribúa á soberanía dixital europea baixo principios éticos e responsables".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.