Unanimidade no Parlamento para garantir a "equidade territorial" na cobertura de médicos

Os tres grupos con representación no Parlamento de Galicia --PP, PSdeG e BNG-- apoiaron unha proposición non de lei no marco da Comisión 5ª para instar á Xunta a "garantir a equidade territorial entre concellos no esforzo de cobertura de prazas de facultativos de Atención Primaria, tamén no verán".

Antes da votación, o defensor da iniciativa, o socialista Julio Torrado, advertiu este xoves aos populares que votar a favor implicaba que o convenio para facilitar casa en Sanxenxo no período estival a faculativos que cubran prazas vacantes "debe revogarse porque rompe profundamente a equidade".

Torrado agradeceu o apoio do PP, pero advertiu seguidamente de que "votan moitas cousas que non cumpren". Con todo, insistiu en que "incentivar unha praza respecto doutra é alterar as condicións laborais". "Se incentivar unha praza non é alterar as condicións laborais, non voten a favor", demandou.

O portavoz socialista no debate recriminou ao Goberno galego o "modelo desfasado da Atención Primaria" con "falta de profesionais" e reprochoulle que "xogue ao Monopoly sanitario" no caso de Sanxenxo. "Quen asina un convenio como este debería dimitir", espetou, á vez que chanceou con que "deixen dirixir o Sergas a Telmo Martín" --respecto diso do alcalde do municipio--.

"SITUACIÓN DRAMÁTICA"

No marco do debate desta PNL, a parlamentaria do BNG Monste Prado insistiu na "situación dramática na que está a Atención Primaria" e matizou que "non é alarmismo, é o día a día". Tras reprochar a "sobreactuación" ao PP na comisión parlamentaria fronte ás críticas da oposición, Prado reprochoulles aos populares que a súa "folla de ruta" pasa por "desprestixiar a sanidade pública" e lamentou que a Xunta fixese "oídos xordos" á situación en Sanxenxo de cobertura desde "hai un ano". Con todo, reprobou que os profesionais teñan que traballan en condicións "inasumibles".

Fronte ás críticas da oposición, a portavoz do PP no debate, Encarnación Amigo, quen pediu como a parlamentaria do BNG "rigor e contención", defendeu votar a favor "no equilibrio das ofertas e incentivos". Aínda que incidiu en que "preocupa a todos a reforma da Atención Primaria", reprochou, como fixo o mércores o conselleiro de Sanidade, Julio García Comesaña, que na reunión das comunidades co Ministerio de Sanidade en Valencia "non se falou da falta de médicos nin da reforma da Atención Primaria".

"Sabemos que hai moitos problemas e non se deixa de traballar par alcanzara esa sanidade de excelencia na comunidade", sentenciou Amigo, quen defendeu que no caso do convenio de Sanxenxo "non hai ruptura de equidade" e lembrou que se trata dunha "iniciativa que xorde da Administración local durante tres meses ao ano", para "atraer profesionais de fóra de Galicia".

REXEITADA

Por outra banda, cos votos en contra o PP, foi rexeitada unha iniciativa do BNG para instar á Xunta a restituír o servizo de Urxencias, a atención médica presencial e repor o persoal médico en Moaña. Os populares alegaron que nas condicións actuais nas que están as instalacións da Casa do Mar onde se prestaba esa asistencia non é posible abrila e anunciaron que as tres prazas de tarde de sanitarios en Moaña serán cubertas en breve porque "existe máis demanda que oferta".

O deputado Paulo Ríos do BNG lembrou que a veciñanza de Moaña leva "27 semanas manifestándose sen resposta real da Xunta" en defensa da atención sanitaria e piden "recuperar" os servizos cos que contaban "antes da pandemia" pola Covid-19. "Moaña sofre falta de persoal", lamentou.

Hemiciclo galego no XI Lexislatura, con Rueda como presidente e Elena Candia na Mesa da Cámara. PARLAMENTO DE GALICIA