Cáritas Diocesana de Mondoñedo-Ferrol atendeu máis de 4.700 persoas o ano pasado
Destinou mais dun millón de euros aos seus diferentes programas para axudar os máis necesitados.
Por E.P. | Santiago de Compostela | 16/06/2022 | Actualizada ás 16:46
Cáritas Diocesana de Mondoñedo-Ferrol atendeu ao longo do ano 2021 a 4.777 persoas en situación de exclusión a través dos seus diferentes programas e servizos e grazas a 358 persoas voluntarias e 13 persoas contratadas. Así o destacou este xoves a coordinadora de Cáritas, Marta Pazo, durante a presentación da Memoria do ano 2021 no Centro de día de inclusión comunitario Gabriel Vázquez Seijas. Alí estivo acompañada do bispo de Mondoñedo-Ferrol, Fernando García Cadiñanos, e do responsable de Comunicación na ONG da Igrexa católica, José María Pérez.
Na súa intervención, Pazo detallou que "a maior parte das persoas atendidas chegaron a Cáritas a través da rede diocesana de acollida, pola que 4.008 persoas foron acompañadas, cun total de 1.608 familias".
No que refire ao perfil das persoas atendidas, "o maioritario continúa sendo o de mulleres, cun 55%, con nacionalidade española, no 64% do caso e con menores a cargo".
Marta Pazo precisou que "aínda que as persoas migrantes non é o perfil maioritario, percíbese un aumento significativo nos últimos anos". Así, cifrou nun 10% o incremento desde o 2018 a pesar do parón que provocou a pandemia na entrada de poboación migrante. Os países de procedencia maioritaria son Colombia, Marrocos e Venezuela.
Ademais, detallou que "a falta de acceso a prestacións e a imposibilidade de incorporarse ao mercado de traballo regulado, arroxa a moitas familias con menores a cargo a vivir na extrema pobreza".
En canto ás persoas sen fogar detallou que no Centro de día de inclusión social Gabriel Vázquez Seijas "acolleu no 2021 a 406, maioritariamente homes de nacionalidade española, do que 95 acudiron por primeira vez nese ano".
Cáritas Diocesana de Mondoñedo-Ferrol investiu no ano 2021 un total de 1.027.324,49 euros, dos cales 829.656,42 euros (80,8%) destináronse aos programas de acción social. Destes, o 37 % destínase a acollida e acompañamento e o 26% a formación e inserción laboral.
Máis de 472.000 euros destináronse directamente a "axudas económicas e as necesidades básicas relativas á alimentación e, cada vez con máis peso, a vivenda, a maior fonte de gasto neste concepto".
