Por Europa Press / Redacción | Santiago de Compostela | 16/06/2022 | Actualizada ás 18:30
A Xunta puxo en marcha unha nova campaña arqueolóxica no pecio do galeón San Giacomo di Galizia, en Ribadeo, para dar continuidade aos estudos iniciados en 2018 e avanzar no coñecemento da construción naval da Coroa Española do século XVI en colaboración co Institute of Nautical Archeology de Texas.
Nesta ocasión, está previsto levar a cabo, durante case tres semanas, unha intervención na parte central do buque e sondar o perfil transversal da embarcación para continuar co estudo da disposición da quilla e da carlinga. Ademais, o equipo técnico liderado polo arqueólogo Miguel San Claudio tamén establecerá un modelo comparativo para seguir á hora de avaliar a evolución da arquitectura naval da época e asentar os mecanismos que permitan monitorar a evolución do xacemento.
O proxecto, que conta tamén coa participación da Unidade de Mergullo da Armada española, complétase co estudo dun novo pecio localizado nunha intervención levada a cabo o pasado ano, así como na ampliación do coñecemento doutros aspectos vinculados á dinámica portuaria a cultura asociada a este porto histórico.
GRUPO INTERNACIONAL DE ESPECIALISTAS
O pecio do San Giacomo é un dos grandes xacementos localizados ata o momento da súa época e, estes últimos anos, está a achegar unha importante información arqueolóxica sobre a construción naval da Coroa española do século XVI.
Neste sentido, hai que lembrar que a Xunta de Galicia impulsou campañas arqueolóxicas nos anos 2018, 2019 e 2020 coa colaboración dun equipo internacional entre os que, ademais de especialistas da Unidade de Mergullo da Armada Española e do Instituto of Nautical Archeology de Texas, destacan expertos do CSIC, da University of Wales Trinity Saint David, do Maritime Archaelogy ou doutras institucións como a Federación Galega de Actividades Subacuáticas, a Real Liga Naval Española ou o Real Club Náutico de Ribadeo.
Na última destas campañas constatouse que se conserva preto dun 20% da estrutura da cuberta ao longo da eslora no costado de babor e localizouse unha cureña naval, un elemento novo en España que consiste nun tipo de carro para montar as pezas de artillaría, así como unha gran cantidade de munición de pedra e ferro.
As campañas dos anos 2018 e 2019 consistiron na realización de sondaxes arqueolóxicas para caracterizar o pecio, concluíndose a existencia dunha gran cantidade de madeira estrutural cun estrato arqueoloxicamente fértil e que conserva, no seu interior, numerosos elementos de interese patrimonial e cuxa potencia se estima moi importante. Ademais, recuperáronse algúns dos obxectos.
Ata o ano 2018, as diferentes actuacións levadas a cabo neste xacemento consistiron na toma de datos para a conservación e o estudo dendrocronolóxico para a datación dos restos. Aínda que ambas as tarefas resultaron relevantes para o coñecemento científico do xacemento, na actualidade está a se traballar nun estudo integral do pecio.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.