Sanidade e querENDO reúnense para mellorar a asistencia ás mulleres con endometriose

A Consellería de Sanidade e a Asociación querENDO mantiveron unha reunión para "seguir avanzando na mellora da asistencia sanitaria" que se presta ás mulleres con endometriose. Así o informou Sanidade nun comunicado, no que explica que o titular desta Consellería, Julio García Comesaña, se reuniu esta semana coa presidenta e secretaria da asociación, Cristina Fernández Feijoo e Iria Pérez Mouriño, respectivamente.

Nesta reunión, á que tamén asistiu o director xeral de Asistencia Sanitaria do Sergas, Jorge Aboal, e a subdirectora de Humanización e Atención á Cidadanía, Josefina Monteagudo Romero, abordáronse diferentes aspectos da atención á enfermidade.

Sanidade destacou a posta en marcha "en todas as áreas sanitarias" de consultas específicas sobre esta patoloxía, así como a intención do Goberno galego de elaborar unha guía asistencial propia sobre a enfermidade "antes de que termine a lexislatura".

A Consellería de Sanidade asumiu, ademais, o compromiso de convocar unha reunión sobre a elaboración da guía de atención a mulleres con endometriose na que participe a asociación querENDO para "trasladar as súas inquietudes e achegas para a guía".

O conselleiro de Sanidade, Xullo García Comesaña, reúnese con representantes da a Asociación querEndo, Mulleres con Endometriose.. CONCHI PAZ/XUNTA / Europa Press