Veciños de Terra de Montes presentaron en Beariz máis de 100 alegacións contra o proxecto de conexión a 400Kv
Sinalan ademais que foi admitida a trámite unha denuncia por presuntas ilegalidades no procedemento administrativo de dous parques no concello do Irixo.
Por Galicia Confidencial | Beariz | 19/06/2022 | Actualizada ás 20:19
A asociación Alarma Terra de Montes presentou o venres 17 de xuño unha serie de alegacións no concello de Beariz ao proxecto Conexión Beariz 400Kv. Acusan de silencio administrativo á
institución local ante as instancias presentadas por vía eléctrónica. Ademais, comprobaron que o proxecto, cuxo periodo de alegacións remata o vindeiro 21 de xuño, non estaba exposto no taboleiro municipal e tampouco na sede electrónica.
Declaran tamén que a mesma situación se deu no Concello de Boborás, nin no taboleiro municipal nin na sede electrónica estaba a exposición do proxecto. Nestes días, e nesta mesma liña sinalan que foi admitida a trámite unha denuncia por presuntas ilegalidades no procedemento administrativo de dous parques no concello do Irixo.
Desde a asociación consideran "necesario e urxente que os concellos expoñan a información ao público tal e como obriga a lei". "É o futuro de todas e todos o que está en xogo", sinalan e non pode ser que "a catro días de finalizar o periodo de alegacións a un parque, este nin sequera estea exposto cando os concellos son os primeiros en ter noticias das empresas". Por último remarcan que "é agora ou nunca, ou están cos veciños, ou coas empresas".
