O PSdeG, tras as andaluzas: "Trasladar o resultado a unha dinámica nacional é incorrecto"

A viceportavoz parlamentaria do PSdeG, Begoña Rodríguez Rumbo, recoñeceu que os resultados das eleccións autonómicas de Andalucía non son os que ao socialismo lles gustaría ter e sostivo que o "único positivo" é que "Vox non entra no goberno". Así se pronunciou ao ser preguntada polo resultado destes comicios, nos que o popular Juanma Moreno logrou a maioría absoluta, con 58 escanos, e o PSOE retrocedeu en tres, ata os 30.

Respecto diso, sostivo que cada territorio ten "as súas propias dinámicas" e "as súas propias formas de entender a política". "En Andalucía o PP ten unha dinámica propia que o levaría a sacar a maioría", dixo Rodríguez Rumbo, que considerou que se deben analizar "moitas vertentes" xa que "nunca se gaña por unha soa causa nin tampouco nunca se perde por unha soa causa".

Por iso, considerou que trasladar o resultado das andaluzas a unha "dinámica nacional non é en absoluto correcto". Ademais, lembrou que o próximo ano se celebrarán os comicios locais e preguntouse se se debería trasladar ás xerais os resultados positivos que o PSdeG poderá obter en cidades como Vigo.

SÁNCHEZ BUGALLO

O alcalde de Santiago, Xosé Sánchez Bugallo, felicitou este luns a Juanma Moreno e ao PP andaluz e congratulouse de que Vox quede fóra do posible futuro Goberno.

"Os cidadáns andaluces foron sensibles ao argumento de que non querían que Vox formase parte do goberno", dixo o rexedor compostelán, preguntado polo resultado dos comicios que, admitiu, "non foi precisamente óptimo" para os socialistas. "Eu preferiría que fose o Partido Socialista, pero, non séndoo, a outra alternativa posible é o PP. Prefiro esta solución á que se adoptou en Castela e León", resolveu.

A continuación, expresou o seu desexo de que, "nuns anos", Vox "siga a mesma evolución que outras forzas que creceron exponencialmente nun momento dado", dixo, en referencia a Ciudadanos e Podemos, "e que as augas volvan á súa canle, que é o marco do constitucionalismo". "O que dá estabilidade ao noso país é que haxa dous partidos maioritarios", expresou Sánchez Bugallo, facendo fincapé no necesario respecto "ao marco constitucional".