Por E.P. | Madrid | 21/06/2022 | Actualizada ás 16:26
O número de establecementos con licenza hoteleira á venda no Estado español creceu un 5% no último ano, ata os 838, segundo os datos de idealista. En Galicia, o número de hoteis en venda é de 63, o que supón un incremento interanual do 19%.
Andalucía, Cataluña e a Comunidade Valenciana concentran practicamente a metade da oferta dispoñible, mentres que en provincias como Cuenca, Córdoba ou Almería duplicouse a dispoñibilidade de hoteis no mercado.
A volta á normalidade e a fortaleza coa que está a volver o turismo parecen animar aos propietarios de hoteis a sacar os seus produtos ao mercado, en busca de novos propietarios que poidan rendibilizar os seus establecementos, segundo sinala o portal inmobiliario.
Aínda que os establecementos hoteleiros están repartidos practicamente por todas as CCAA (coa excepción de Ceuta e Melilla), Andalucía, Cataluña e a Comunidade Valenciana concentran practicamente a metade da oferta no mercado. En Andalucía hai 178 hoteis en venda, en Cataluña 134 e na Comunidade Valenciana alcanzan os 90.
A continuación, sitúanse as comunidades de Castela e León (78 hoteis), Baleares (64 establecementos), Galicia (63), Canarias (46), Castela-A Mancha (38) e Madrid (35). Por baixo dos 30 hoteis están Aragón (29), Asturias (26), Estremadura (22) e Cantabria (15). O vagón de cola está liderado por Navarra (2 hoteis), Murcia, A Rioxa e Euskadi (con 6 hoteis cada unha).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.