Por Europa Press / Redacción | A CORUÑA | 22/06/2022 | Actualizada ás 12:20
A colección 'Lume', sobre a traxedia dos incendios forestais e as consecuencias do cambio climático, foi seleccionada como gañadora do XVI Premio 'Luís Ksado' de creación fotográfica, que convoca a Deputación da Coruña e que, unha vez aberta a plica, resultou ser obra do fotoxornalista ourensán Brais Lorenzo.
O xurado que valorou o total das coleccións presentadas nesta edición estivo composto por Andrea Costas Lago, Maria Phyliss Sarxa Mann, Silvia Omedes Alegre, Judith Prat Molet e Eduardo Rodríguez, e presidido polo deputado de Cultura, Xurxo Couto.
No seu informe, o xurado destacou da colección 'Lume' a actualidade do tema "contado nunha secuencia que visualiza o drama humano e o ecolóxico". "Todo na liña do máis puro fotoperiodismo, onde a narrativa visual fai fincapé nas persoas que viven intres de tensión".
"Doce fotos en cor que cada unha ten vida propia e á vez o conxunto conta unha historia" indica o xurado na acta. Destaca, ademais, "a capacidade do autor para narrar visualmente unha historia en imaxes, xa que a colección ten unha narrativa exquisita que mostra unha proximidade física ao tema non só nos momentos do incendio, senón despois, as consecuencias".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.