Por E.P. | SANTIAGO DE COMPOSTELA | 23/06/2022 | Actualizada ás 11:08
Os hoteis galegos rexistraron 766.477 pernoctacións e 442.557 viaxeiros en maio, o que supón os mellores datos na serie histórica (desde 1999) que publica o Instituto Nacional de Estatística (INE).
E é que estas cifras superan o que ata agora era o mellor maio dos hoteis galegos, 2019, o último prepandemia, no que houbo 765.901 pernoctacións e 425.307 viaxeiros. Ademais, estes datos supoñen triplicar os rexistrados en maio de 2021.
En España, as pernoctacións en establecementos hoteleiros superaron os 29,8 millóns, o que supón multiplicar por catro o dato de hai un ano, cando houbo 7,3 millóns de pernoctaciones. Galicia foi a sétima comunidade preferida dos residentes en España, cun 5,1% do total, nunha clasificación que encabeza Andalucía (21,7%).
Pola súa banda, o grao de ocupación praza nos hoteis galegos é dos máis baixos en España, con só un 39,9%, 15 puntos menos que a media do 54,9%. En Canarias alcánzase o 62,1%. Así mesmo, os prezos hoteleiros incrementáronse un 17,3% en maio en Galicia, menos que a media de avance do 22,1% que se produce no Estado.
A tarifa media diaria dos hoteis en Galicia é de 63,98 euros, das máis baixas do país, lonxe dos 95 euros da media estatal. Os ingresos por habitación dispoñible son de 29,5 euros, tamén á cola, aínda que se duplican no último ano.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.