Por E.P. | SANTIAGO DE COMPOSTELA | 25/06/2022 | Actualizada ás 15:41
Un total de 236 axentes de Policía Nacional e Garda Civil reforzarán os dispostivos de seguridade desde a próxima semana nos principais puntos turísticos de Galicia durante esta tempada estival.
O delegado do Goberno, José Miñones, mantivo un encontro para coodirnar este dispositivo co xefe superior de Policía de Galicia, Ramón Gómez Nieto, e co xeneral xefe da Garda Civil en Galicia, Francisco Rodríguez.
O reforzo de seguridade estenderase desde o 1 de xullo ao 31 de agosto, aínda que a súa duración e intensidade podería variar en función das necesidades. Durante ese tempo, 138 policías nacionais e 98 garda civís despregaranse en puntos da costa e do Camiño de Santiago, principalmente.
"O aumento de visitantes previsto para este verán en Galicia é un reto para a seguridade e o Goberno responde a este desafío cun reforzo dos medios e coas medidas preventivas deseñadas polo Ministerio do Interior para manter a convivencia pacífica", resaltou Miñones.
O obxectivo, segundo explicou a Delegación do Goberno nun comunicado, é "aumentar a seguridade cidadá para favorecer a afluencia turística mediante un dispositivo que permite incrementar a vixilancia e control preventivo".
Deste xeito, o operativo especial prestará atención a vías de comunicación urbanas e interurbanas, estacións, portos, aeroportos, hoteis, praias e cámpings, así como os lugares que alberguen eventos de gran concentración de persoas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.