Renovada a colaboración entre Abanca e as federacións galegas de Confrarías de Pescadores e de Comercio
O texto foi rubricado este luns en Santiago de Compostela por parte do director de Abanca Mar, Javier Fraga, e o presidente da Federación, José Antonio Pérez.
Por E.P. | SANTIAGO DE COMPOSTELA | 04/07/2022 | Actualizada ás 18:00
A Federación Galega de Confrarías de Pescadores difundiu un comunicado no que informa de que renovou con Abanca, un ano máis, un acordo financeiro de colaboración que ten como obxectivo principal dar resposta ás demandas do sector co foco posto "no acceso ao crédito e na sustentabilidade".
O texto foi rubricado este luns en Santiago de Compostela por parte do director de Abanca Mar, Javier Fraga, e o presidente da Federación, José Antonio Pérez.
Durante o encontro, ambos os representantes conversaron sobre os retos actuais aos que se enfronta o sector e o representante de Abanca resaltou o compromiso que mantén a entidade financeira coa economía de proximidade e co sector primario en Galicia.
Para que esta renovación sexa posible, a unidade especializada Abanca Mar volve habilitar aos membros da Federación as hipotecas navais e os préstamos a tipo fixo con "amplos prazos de amortización, posibilidade de carencias e intereses moi competitivos".
Desta forma, poderán realizar unha remodelación ou segunda adquisición de barcos máis eficientes e respectuosos co medio ambiente. Así mesmo, promoveranse tamén outros produtos específicos para realizar investimentos sustentables e así realizar un adecuado desenvolvemento dos negocios, segundo traslada o comunicado.
ACORDO COA FEDERACIÓN DE COMERCIO
Abanca tamén renovou o seu convenio de colaboración coa Federación Galega de Comercio, co foco posto no apoio aos negocios locais e de proximidade a través de "unha importante oferta" que, segundo destaca nun comunicado, inclúe a potenciación do acceso ao crédito.
A firma tivo lugar en Lugo entre o presidente da Federación, José María Seijas, e o director territorial de Abanca en Lugo, Javier Soto. Durante o acto, ambos intercambiaron impresións sobre os retos actuais aos que se enfronta o comercio en Galicia.
Así, ambas as entidades elaboraron un catálogo específico para potenciar o acceso ao crédito de negocios de proximidade. A firma coincidiu cunha nova campaña dos 'Días Azuis do Comercio Galego', creada para incentivar as compras locais e premiar aos consumidores.
Soto lembrou que o banco conta cun plan de acción especial para axudar a pemes e autónomos a acceder ás axudas europeas do Kit Dixital, apoiando tanto a tramitación e a xestión de solicitudes, como a través de solucións financeiras específicas.
