Nace Nodo, a plataforma para a intelixencia artificial en Galicia

Nodo galicIA, estrutura de colaboración entre Xunta, universidades e Eurorrexión Galicia-Norte de Portugal, foi constituída este martes co fin de impulsar a intelixencia artificial (IA).

Entre as súas primeiras medidas, Nodo promoverá a candidatura de Galicia para acoller a sede da futura Axencia Española de Supervisión de Intelixencia Artificial. Ademais, aprobará un marco ético que elaboran conxuntamente Xunta e as tres universidades públicas co fin de adaptar a lexislación a esta nova realidade.

O vicepresidente económico da Xunta, Francisco Conde, presidiu a constitución da comisión de seguimento de Nodo. Así, referiuse ás potencialidades da intelixencia artificial en ámbitos como o sanitario, económico e servizos públicos. A isto súmanse as oportunidades que xera para a captación de talento e o crecemento do tecido empresarial.

Esta iniciativa concentrará todos os axentes públicos e privados na comunidade galega relacionados con esta tecnoloxía de face a unha IA ética e fiable. Nodo GALICIA é o elemento vertebrador da Estratexia Galega de Intelixencia Artificial 2030, que conta cun investimento público de 330 millóns de euros.

A nova plataforma constituirá un comité de persoas expertas en intelixencia artificial e un comité de avaliación de iniciativas de GovTech para a aplicación da IA no sector público. Neste acto participaron, entre outros, o conselleiro de Facenda, Miguel Corgos; a copresidenta do Intergrupo de Intelixencia Artificial e Dixital do Parlamento Europeo, Pilar del Castillo, e a secretaria de Estado de Dixitalización e Intelixencia Artificial, Carme Artigas.

Exposición de Intelixencia Artificial que acollerá a sede de Afundación na Coruña. AFUNDACIÓN