Por Europa Press / Redacción | SANTIAGO DE COMPOSTELA | 08/07/2022 | Actualizada ás 15:00
A presidenta da Deputación de Pontevedra, Carmela Silva, presentou este venres un novo vídeo, deseñado e creado pola artista Yolanda Domínguez, co que a institución provincial quere concienciar contra as agresións sexuais.
O audiovisual mostra imaxes do interior dun bolso (onde unha moza parece deixar o seu teléfono móbil coa cámara de vídeo gravando) mentres se escoita unha conversación entre unha moza e un mozo que están a iniciar unha relación. Nun momento dado, a muller pide parar. Difundirase nos festivais de música e cinema da provincia e nas salas de cinema de Pontevedra, Vigo e Vilagarcía.
Segundo os datos difundidos por Carmela Silva nunha comparecencia de prensa, cada catro horas prodúcese en España unha violación, pero soamente se denuncia o 11%. No primeiro trimestre de ano rexistráronse 544 violacións. "É dramático" dixo, "temos que poñernos en contra e facer que a loita contra estas terribles agresións que padecemos as mulleres forme parte das prioridades políticas das administracións públicas. Desde logo desta administración xa o é".
Só existe consentimento cando as mulleres din si
— Deputación Pontevedra (@depo_es) July 8, 2022
🙎♀️ #LembraEuDecidoTiRespectas
🙎♂️ #ContaComigoEuRespéctote
Campaña da @depo_es para a prevención do acoso e agresións sexuais
🎬 Dirección: @yodominguez pic.twitter.com/vJKb6kQ3TN
EN POSITIVO
A artista Yolanda Domínguez subliñou que "as cifras demostran que segue habendo maltratadores e asasinos de mulleres" polo que "teriamos todo o dereito do mundo de representar esa realidade", pero "estamos a facer un enorme esforzo por expor campañas de denuncia en positivo, que representen homes comprometidos, que son parte do cambio, como é o caso deste vídeo".
O vídeo, "de altísimo nivel e gran calidade técnica e de contido", segundo valorou a presidenta, tamén presenta outro modelo masculino "de home consciente de que soamente si é si, de que o consentimento é unha cuestión que decidimos as mulleres e facémolo cando dicimos exclusivamente que si".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.