O Sergas notifica 26 novas mortes con Covid desde o 1 de xullo
Os casos activos continúan á baixa en Galicia, con algo máis de 14.500, mentres que as persoas ingresadas se manteñen estables en 932.
- Ana Pontón advirte: "a pésima xestión" da Xunta é un "cóctel explosivo" para a sanidade
- Alerta en Europa pola nova onda da Covid: piden a vacinación dos maiores de 60 anos
Por Europa Press / Redacción | SANTIAGO DE COMPOSTELA | 12/07/2022 | Actualizada ás 11:36
O Servizo Galego de Saúde (Sergas) notificou este martes outras 26 mortes de persoas que estaban diagnosticadas de covid-19 e que se corresponden a sete días distintos, a contabilizar desde o 1 de xullo. As vítimas tiñan idades comprendidas entre os 64 e os 96 anos.
Así, segundo os datos rexistrados pola Consellería de Sanidade, o 1 de xullo faleceu un home de 84 anos na área sanitaria de Ferrol. Ademais, o Sergas notifica un novo óbito o día 6, outro home de 84 na área de Lugo-A Mariña-Monforte; e o día 7, unha muller de 78 na área de Vigo.
Pero a maioría das novas mortes (23) das que se informa este martes correspóndense a entre os días 8 e 11 de xullo. Así, o venres 8 morreron 10 persoas diagnosticadas de covid-19, tres delas correspondentes á área de Vigo (tres homes de 77, 81 e 96 anos) e outro tres á de Lugo (mulleres de 89, 94 e 95). A estas súmanse dúas vítimas na de Ourense-Verín-O Barco de Valdeorras (home de 77 e muller de 91), unha na de Pontevedra-O Salnés (home de 82) e outra na de Santiago-Barbanza (home de 80 anos).
En canto ao sábado 9, o Sergas rexistra seis falecidos: dous na área da Coruña-Cee (mulleres de 64 e 89 anos), unha na de Santiago (muller de 64), unha na de Pontevedra (muller de 87), unha na de Ferrol (muller de 88) e unha na de Lugo (home de 90).
Do mesmo xeito, o domingo 10 morreron diagnosticados de covid catro persoas, concretamente nas áreas da Coruña (muller de 72 anos), Vigo (home de 81), Ourense (home de 88) e Lugo (muller de 93). Finalmente, na xornada deste luns, houbo outro tres falecementos na de Vigo (home de 76), na de Lugo (muller de 76) e na de Pontevedra (muller de 88).
Con estes novos 26 óbitos correspondentes a sete días distintos, os falecementos relacionados coa pandemia que rexistra a Consellería de Sanidade elévase a 3.689.
PRESIÓN HOSPITALARIA ESTABLE
Con todo, o resto de datos que ofrece o Sergas parecen consolidar a súa tendencia á baixa iniciada o fin de semana. Así, Galicia contabiliza un total de 14.539 casos activos --672 menos que un día atrás-- nun día con menos de 900 novas infeccións. Con todo, a presión hospitalaria mantense estable, con 932 ingresados.
Segundo os datos actualizados este martes pola Consellería de Sanidade, con rexistros ata as 18,00 do luns, recollidos por Europa Press, os 932 pacientes con coronavirus --sen cambios con respecto ao día anterior-- que requiren hospitalización no conxunto de Galicia repártense entre 901 en planta e 31 en unidades de coidados intensivos. O pasado martes, 5 de xullo, había 836 hospitalizados en total, case un centenar menos.
Esta estabilidade prodúcese debido a que hai tres áreas sanitarias que reducen os ingresados e outras tres que aumentan, aínda que na de Ferrol non varían: hai 69 enfermos covid hospitalizados, 68 en unidades convencionais --un máis-- e un na UCI --uno menos--. En canto ás áreas que rexistran unha baixada na presión asistencial, está a da Coruña-Cee con 176 ingresados (-6), dos cales seis están en críticos; a de Santiago-Barbanza con 147 (-3), cinco deles en coidados intensivos (sen cambios); e a de Lugo-A Mariña-Monforte, con 120 (-3), deles oito na UCI (sen variación).
No lado oposto, aumentan a cifra de hospitalizados a área de Ourense-Verín-O Barco de Valdeorras, a 174 (+5), cinco deles en coidados intensivos (+1); a de Vigo, con 126 (+1), dos que catro están críticos (-1); e a de Pontevedra-O Salnés, con 120 en total (+6), dous deles na UCI (sen cambios).
BAIXAN OS CASOS ACTIVOS
Tras o descenso de casos activos rexistrados o pasado fin de semana, os datos deste martes seguen reflectindo esta tendencia ata situarse en 14.539 en toda Galicia, 672 menos que hai un día, ao rexistrarse máis altas que novos contaXios. Esta cifra xa é inferior á do martes da semana pasada, cando había 14.754.
O descenso é xeneralizado nas sete áreas sanitarias galegas. Así, a da Coruña continúa como a que ten máis pacientes covid con 2.935 (-111), seguida da de Santiago con 2.494 (-105), da de Lugo con 2.147 (-99), de Ourense con 2.117 (-82), de Vigo con 2.099 (-132), de Pontevedra con 1.462 (-93) e de Ferrol con 1.260 (-50).
CONTAXIOS EN DESCENSO
Así mesmo, o Sergas rexistrou nas últimas 24 horas analizadas un total de 884 novos positivos por covid-19, que implica unha baixada con respecto a días pasados. Co protocolo actual non se contabilizan os autotest positivos e non se fan probas de diagnóstico a poboación en xeral, salvo á vulnerable. O martes 5 de xullo houbo 1.516 infeccións.
De todos os novos contaxios notificados, 160 correspóndense coa área de Ourense, seguida da de Lugo con 144, e de Vigo e A Coruña con 143 cada unha. Así mesmo, a de Santiago contabiliza outros 131, a de Pontevedra 83 e a de Ferrol 79.
Segundo o último informe actualizado polo Ministerio de Sanidade este pasado venres, 8 de xullo, adaptado ao novo sistema de vixilancia da Covid-19 centrado en poboación vulnerable, a incidencia acumulada a 14 días en Galicia en maiores de 60 anos aumentou a 1.399,22 casos por 100.000 habitantes, mentres que a media estatal subiu a 1.225,28.
En Galicia a incidencia no grupo de idade de 60 a 69 anos ascendeu a 14 días a 1.226,42 casos por 100.000 habitantes; no de 70 a 79 anos a 1.448,73; e no de maiores de 80 anos subiu a 1.595,89. Fronte a iso, desde o inicio da pandemia, 642.854 persoas curáronse da covid, despois de recibir a alta outros 1.530 pacientes nas últimas horas.
