Aprazan a 'Reunión de Maiores' no Carballiño prevista para este sábado debido ás elevadas temperaturas

A Xunta de Galicia aprazou a celebración da 42ª edición da 'Reunión de Maiores' prevista para este sábado 16 de xullo no Carballiño por mor das elevadas temperaturas que se esperan para este fin de semana.

A Consellería de Política Social, organizadora deste evento, lamenta o adiamento e buscará unha data alternativa, pero considera que "é unha medida prudente e necesaria" ante a onda de calor que vive a provincia de Ourense estes días, onde na xornada deste martes as temperaturas rexistraron topes históricos, superando os 43 graos.

En concreto indican que, segundo as predicións de Meteogalicia, para este fin de semana o Concello do Carballiño rexistrará máximas de ata 38 graos e en base a iso tomouse esta decisión tendo en conta "as recomendacións sanitarias para garantir tanto a seguridade como a saúde das persoas que desexaban asistir ao encontro".

Estaba prevista a participación dun total de 2.000 persoas procedentes de toda Galicia, segundo adiantara o director xeral de Maiores e Atención Sociosanitaria, Antón Acevedo, na presentación da festa.

Nese mesmo acto avanzara o programa da celebración, con "xogos, coreografía, música e entrega de agasallos tanto a centros como asociacións de referencia", xantar popular e concertos a cargo da Orquestra Principal e de Pili Pampín; todo iso no Parque Municipal do Carballiño.

Con todo a reunión foi aprazada e aínda non hai data alternativa, pero a consellería traballa para levar a cabo esta celebración, que se recuperaba tras dous anos de parón, e coa que se pretende pór en valor o envellecemento activo e impulsar a oferta de lecer das persoas de máis idade.

Alberto Núñez Feijóo, nunha Xuntanza dos Maiores do Carballiño. XUNTA DE GALICIA