Por E.P. | SANTIAGO DE COMPOSTELA | 15/07/2022 | Actualizada ás 14:03
A portavoz nacional do BNG, Ana Pontón, recriminou que a Xunta "se pon de perfil" e non toma medidas ante a inflación. Reproba que o Goberno galego só aproveitase o Consello desta semana, celebrado o día despois de coñecerse que o IPC galego se disparou un 11,1%, para "conceder medallas" e anunciar unha axuda para bicicletas eléctricas que "só pode comprar unha minoría".
Este venres, Pontón visitou a Praza de Abastos de Santiago para "pór o foco nos problemas que cada día teñen a maioría das familias do país", que viven un incremento "exponencial" de prezos, que van do "12% ao 32%" nos alimentos.
"Non é de recibo que a Xunta estea de brazos cruzados", asevera. Reproba que é un goberno "insensible ante os problemas que ten a maioría da cidadanía". De feito, censura que o Executivo galego "está a tomar decisións que van na dirección contraria". Cita exemplos como aprobar hai uns días unha lei para que suporá "subir" a factura da auga, ademais de suprimir a Tarxeta Básica.
Incide en que o Goberno galego está "instalado na política de canto peor, mellor", "canto peor para a maioría dos galegos, mellor para os intereses electorais do PP". "En política non vale todo", avisa Ana Pontón, e di que "esta é a peor política que se podería facer neste momento".
"É impresionante como un goberno como o galego se pon de perfil ante unha crise de prezos que está a afectar máis a Galicia que a media do Estado", insistiu, pois é a "terceira comunidade coa media máis alta" na escalada de prezos.
PROPOSTAS
De tal forma, o Bloque reclama que a Xunta "se poña á fronte" e "tome medidas eficaces". Sostén que é necesario que, "no curto prazo", se axude aos que "peor o están pasando". "Que se poñan a traballar xa, se non, é mellor que deixen paso", afirma.
Entre as propostas da formación nacionalista atópanse que se suba o complemento das pensións non contributivas, que se incremente a contía da Risga e sexa compatible co Ingreso Mínimo Vital, que se poña en marcha un paquete "potente" para axudar a gastos básicos de vivenda, ademais de que se recupere a Tarxeta Básica.
A portavoz nacional do BNG pide "non perder de vista que hai 600.000 persoas en risco de pobreza" en Galicia. Tamén empraza a que as axudas cheguen ao tecido produtivo, de forma que se compense aos sectores produtivos que proporcionan alimentos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.