Reaccións lumes- A Xunta di ter controlado o 90% do perímetro dos incendios de Lugo

A Xunta asegura ter controlado "un 90% do perímetro" do seis incendios activos nas localidades lucenses de Folgoso do Courel e A Pobra do Brollón que, xunto ao tres incendios de Quiroga, calcinaron xa case 3.000 hectáreas. Segundo confirmou o técnico de distrito da Consellería Ramón Recaman, a orografía da zona, "con pendentes acusadas" ás que só poden chegar medios aéreos, dificulta o control.

En todo caso, afirmou que a previsión é que ao longo deste domingo se consiga que todos os incendios activos nestes momentos na zona -- seis en total, que afectan os municipios de Folgoso do Courel, Samos e A Pobra do Brollón-- pasen a unha fase de estabilización.

En declaracións aos medios desde o posto de mando avanzado desde o que se xestionan os incendios rexistrados na provincia de Lugo, na Pobra do Brollón, o conselleiro do Medio Rural, José González, explicou que os incendios en Galicia "non están a avanzar" e agora os medios céntranse en perimetrar as zonas afectadas para dar por controlados os lumes e traballar en que "non se fagan reproducións".

"Non queremos falar de estabilización ou control, pero podemos dicir que os incendios non están a avanzar e traballamos para que no seu perímetro non se fagan reproducións. Agora o traballo céntrase en finalizar a perimetración dos incendios, evitar que ardan máis hectáreas e, a partir de aí, un traballo moi forte para refrescar o perímetro", explicou o conselleiro.

Así, José González sinalou que é un día "para a esperanza" porque "practicamente" os medios teñen perimetrados a maioría dos incendios. "Non están aínda en fase de estabilización, pero están preto", insistiu. O titular de Medio Rural afirmou que a situación "se desbordou" o xoves pola caída de máis de 6.000 raios en Galicia e "fixeron dano alí onde non houbo choiva".

Así mesmo, puntualizou que continúa activa a situación 2 en varios destes incendios por posible afectación a aldeas "de maneira preventiva", pero asegurou que neses núcleos "o perigo xa pasou".

PECULIARIDADE DOS INCENDIOS

Ademais, o director xeral de Defensa do Monte, Manuel Rodríguez, destacou a "peculiaridade" destes incendios con orixe "nun sistema convectivo absolutamente inusual e brutal". Neste sentido, detallou que en zonas como as da Pobra ou Folgoso, "de media montaña", os raios "caen en ladeiras e no cume" e provocan incendios "moi rápidos con evolución de difícil prognóstico".

"É un escenario difícil para traballar na extinción, pero a pesar de todo estamos a gañar esta batalla. Quedan puntos conflitivos e hai que evitar reproducións, que son moi fáciles nestas condicións", salientou o director xeral.

BNG PIDE COMPARECENCIAS

Pola súa banda, o BNG pediu a comparecencia "urxente" no Parlamento de Galicia do conselleiro do Medio Rural, José González, ante a sucesión de incendios e a "situación de risco extremo".

Os nacionalistas piden que o conselleiro compareza na Deputación permanente do Parlamento para explicar as medidas que está a adoptar a Xunta para paliar os múltiples incendios que se produciron en Galicia desde o pasado xoves. Ademais, nunha nota de prensa, o BNG cualifica de "realmente preocupante" que haxa denuncias de "distintas partes do territorio de brigadas que están sen a metade dos seus efectivos", mesmo, engadiu, "casos nos que a brigada só conta cun profesional".

Así mesmo, a deputada María Albert subliñou que os incendios afectan especialmente a zonas do territorio "de importante valor ambiental e natural" que, na súa opinión, "debería ter unha protección especial, como é o caso de O Courel, O Invernadeiro ou Trevinca".

Por outra banda, o BNG tamén demanda ao titular do Medio Rural que explique na Cámara galega "por que os convenios cos concellos están maioritariamente sen asinar" ou "por que as brigadas municipais non están a traballar ou os convenios de motobomba inoperativos".