Por E.P. | Santiago de Compostela | 22/07/2022 | Actualizada ás 16:46
O alcalde de Santiago, Xosé Sánchez Bugallo, asegurou que o radar do Restollal seguirá en funcionamento a pesar da recente sentenza xudicial que cuestiona a súa operatividade. Así se expresou a preguntas en relación coa sentenza do Xulgado do Contencioso-Administrativo número 2 de Vigo, que falla a prol do condutor dun vehículo denunciado por exceso de velocidade neste tramo da capital galega en novembro de 2021.
Nela, cuéstionase que o cinemómetro "sexa capaz de detectar, seguir e identificar inequivocamente o obxectivo durante todo o proceso de medición". Segundo se extrae da sentenza, esta incapacidade de seguimento do vehículo débese a que o radar "só ten unha cámara".
Ante este ditame, Bugallo declarou que tanto este radar como o de Conxo, que funcionan co mesmo sistema, vanse " manter en funcionamento" porque "non hai ningunha sentenza que obrigue á súa paralización". Ademais, o primeiro edil mostrouse "sorprendido" polo que apunta o fallo en relación coa existencia dunha soa cámara: "Non coñecía que os radares tivesen dous cámaras".
"Podo asegurar que todas as cámaras de Santiago están homologadas e sometidas a un procedemento de control e revisión", afirmou Bugallo. Igualmente, destacou que os cinemómetros "cumpren a súa función" e reduciron a velocidade dos vehículos e o índice de sinistralidade do centro urbano de Compostela.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.