O ecoloxismo galego tacha de "errática e irresponsable" a política ambiental e forestal da Xunta
A Federación Ecoloxista Galega reclama medidas para "frear os incendios forestais" e "enfrontar a emerxencia climática".
Por Europa Press / Redacción | SANTIAGO DE COMPOSTELA | 24/07/2022 | Actualizada ás 19:27
A Federación Ecoloxista Galega (FEG), que reúne a 14 asociacións ecoloxistas de toda Galicia, reclamou á Administración medidas para "frear os incendios forestais" e "enfrontar a emerxencia climática". Nun comunicado, lamentou que os incendios que se viven nos últimos días en Galicia eran "predicibles", xa que se coñece "sobradamente" que existen patróns de comportamento do sistema meteorolóxico que o fan "máis agresivo cada vez".
Ante esta situación, a FEG asegurou que leva "moitos anos" demandando á Administración que "se tome en serio" a emerxencia climática. Sobre isto, pediu que se preserven as formacións naturais protectoras das sucesións ecolóxicas e dos recursos hídricos. Ademais, denunciou que solicitaran unha política forestal "ambientalmente responsable", pero a Administración "aprobou un Plan Forestal renovado que favorece a expansión das especies pirofóricas, as que arden e axudan á extensión dos incendios forestais".
Para a FEG, estes incendios constitúen "un fracaso" de todo o conxunto da poboación, pero tamén son o resultado "dunha política ambiental, forestal e de control do lume erráticas e irresponsables". Así, sinalou que é necesario "facer autocrítica" e indicou que existen "responsabilidades con cargos e nomes concretos".
SOLIDARIEDADE COS POBOS AFECTADOS
Así mesmo, as asociacións ecoloxistas mostraron a súa preocupación e solidariedade cos habitantes das zonas dos incendios do último mes e tamén con todas as persoas que "están a realizar un inmenso esforzo, carecendo dos medios imprescindibles para conter o avance do lume".
"Compartimos a dor pola perda de fogares e de recursos dos habitantes da zona, polos danos físicos e morais, pola destrución dos ecosistemas máis valiosos: o Courel, a Serra da Enciña da Lastra, o Invernadeiro; bosques míticos onde se atopaban algúns dos últimos refuxios de biodiversidade", lamentou a Federación.
Agora, esixen actuacións á administración e que empece xa a planificar os traballos de protección dos chans nas áreas queimadas "antes de que sexan arrasados pola erosión" e a restauración dos ecosistemas destruídos. "Esiximos políticas forestais protectoras, que rebaixen a combustibilidade do monte, que proporcionen recursos diversificados no rural. É o noso futuro", concluíu.
