O BNG mobilízase no Día da Patria: "Nacemos para ser a forza maioritaria, imos a por todas"
Miles de persoas ateigaron a Praza da Quintana, en Santiago de Compostela.
Por Europa Press / Redacción | SANTIAGO DE COMPOSTELA | 25/07/2022 | Actualizada ás 15:26
"O BNG non naceu para ser unha corrente de opinión, naceu para ser a forza maioritaria". Con esta proclama a líder do Bloque, Ana Pontón, sintetizou parte do discurso pronunciado este Día dA Patria Galega ante miles de persoas na compostelá Praza da Quintana, último tamén antes do proceso electorais do próximo ano nos que a dirixente puxo a mirada: "Quero que levedes unha mensaxe clara deste 25: imos a por todas, sen límites, porque non queremos porlle límites ao futuro de Galicia".
Pontón dirixiuse aos seus nun ano en que o BNG cumpre 40 anos da súa fundación no frontón de Riazor para avisar de que as eleccións municipais "son unha excelente ocasión para avanzar", despois de que, en 2020, a formación nacionalista se convertese en segunda forza política do Parlamento galego, superando ao PSdeG en votos e escanos.
"Foi a forza dese amor a que, un 25 de setembro de 1982, moveu por centos de homes e mulleres a levantarse cedo, saír das súas casas e con toda a decisión e ilusión, xuntarse para fundar o Bloque Nacionalista Galego; 40 anos despois, quero darlle as grazas a todas e cada unha desas persoas. Grazas porque non sempre foi fácil, pero mereceu a pena. Sen esa xeración valente, hoxe non estariamos aquí e Galicia non sería a mesma", proclamou.
A dirixente nacionalista expuxo un proxecto que, "a diferenza" do resto de formacións políticas, "só ten que render contas aos galegos" ."Non somos todos iguais", proclamou Pontón, nun discurso no que ofreceu o seu proxecto unha Galicia "con futuro" e unha "saída xusta da crise".
Durante a súa intervención, cargou contra as políticas propostas contra o cambio climático, "un problema real", as cales --dixo-- están "a quedarse en postureo" --do Goberno central e UE-- ao basearse en "encher de muíños eólicos todos os montes e fondos mariños, volver ás centrais de gas e carbón e instalar novas nucleares e obrigar a pagar por circular polas cidades". "Cando se vai tomar en serio?", preguntouse Pontón, quen mostrou a súa "dor" polos incendios. Neste punto, enviou unha mensaxe de solidariedade coas familias afectadas e de apoio tamén para os equipos que loitan contra o lume, para, a continuación, reclamar que estes incendios "sexan un punto de inflexión".
CRÍTICAS POLA "IMPUNIDADE" DA CASA REAL
Durante a súa intervención ironizou con que este ano quen tamén censurou a "fuxida" dun Feijóo, que atribuíu ao "desastre" no que quedou Galicia, cunha "sanidade contra as cordas" e "unha inflación por encima da media". Nese sentido, censurou como este ano "durante tres meses", os galegos puideron ver "un presidente e un vicepresidente da Xunta que abandonaron os seus deberes de goberno" en "medio da maior crise de prezos".
A apenas uns metros da catedral en que se celebraba a Ofrenda ao Apóstolo con discurso do rei, Pontón tamén afeou a "impunidade" coa Casa Real. "Non son borbóns, son bribóns", dixo aos asistentes, que seguiron a proclama durante uns segundos con algúns asubíos e algún apupo.
No seu repaso, Pontón tampouco pasou por alto "unha guerra que nos arrepía" e reivindicou a "coherencia" do BNG no seu defensa "antiimperialista" e do "pacifismo". "E desde a coherencia dicimos que todas as persoas refuxiadas son iguais, con independencia da cor da súa pel. E por iso tampouco podemos mirar para outro lado ante o masacre de Melilla, ao contrario, que queremos que se investigue", recalcou, antes de recriminar o "rearmamento do militarismo" para acabar cun "non máis OTAN".
"NACEMENTO DUN NOVO MUNDO"
A líder nacionalista quixo pór o foco no futuro, no "nacemento dun novo mundo, un mundo multipolar, do mundo das nacións, dos pobos que queren controlar o seu destino e avanzar sen submisións". "Xogámonos avanzar ou retroceder, e nós queremos apostar por un mundo igualitario, respectuoso co medio ambiente e feminista. O BNG quere participar na construción dese novo mundo que debe emerxer a pesar de todas as resistencias", apontoou.
Acompañada da executiva e de alcaldes e alcaldesas nacionalistas no estrado, Pontón destacou que o BNG chega aos 40 anos como unha "forza cohesionada e ilusionada", unha "organziación con experiencia e a madurez necesarias para presidir o próximo goberno do país e liderar un tempo novo". E neste escenario, volveu "tender a man a todas esas persoas que levan este país na súa cabeza, no seu corazón para, desde esa suma, construír a Galicia que queremos e merecemos".
"GALIZA CEIBE, PODER POPULAR"
Tras a locución da portavoz nacional --precedida da secretaria xeral de Galiza Nova, Marta Gómez, cun discurso de "rebeldía" xuvenil--, as miles de persoas que abarrotaron a Praza da Quintana interpretaron o Himno de Galicia nun peche do acto central da organización nacionalista con proclamas de "Galiza Ceibe, poder popular" e algúns berros de independencia. Antes da chegada da portavoz nacional á Quintana chegáronse a ver unhas bandeiras de España ao fondo dun grupo de persoas, pero non permaneceron na praza.
A manifestación, que tivo entre os seus asistentes tamén ao veterano político Camilo Nogueira --recentemente galardoado cunha Medalla Castelao--, celebrouse baixo o lema 'Gañar o futuro' e volveu contar coas delegacións internacionais convidadas. Tras a asistencia do líder de ERC, Oriol Junqueras, na edición de 2021, nesta ocasión destacou a presenza de Joana Mortagua (Bloco de Esquerdas), e as deputadas no Congreso Marta Rosique (ERC) e Mertxe Aizpurua (EH Bildu).
Antes da marcha que encheu de miles de persoas as rúas compostelás --e que non puideron entrar todas na Quintana--, a líder do BNG desexou aos galegos un "feliz día, sintan como sintan a galeguidade". "Evidentemente, Galicia é unha nación, temos dereito a avanzar en igualdade a outras nacións do mundo, a traballar desde aquí por un mundo mellor e Galicia é un gran país que queremos construír entre todos", proclamou.
ANTES DE ANO ELECTORAL
Pontón encara agora a recta para volver medir as forzas da formación despois do ascenso cultivado en xullo de 2020, ao superar ao PSdeG en votos e escanos, e tras desaparecer unha cuarta formación política do espazo 'rupturista' --con deputados desde 2012--, que se sustentaba en Anova, Podemos e Esquerda Unida.
Precisamente, a formación nacionalista fundada por Xosé Manuel Beiras (un dos fundadores do Bloque, que abandonou a organización en 2012) celebrou este Día da Patria unha comida de confraternización. Pola súa parte, Podemos Galicia trasladou a través dun comunicado un pensamento especial, no día da "matria galega", para todos aqueles que están a padecer os lumes forestais e a "virulencia dos incendios que destrúen os montes, pobos e fogares".
