García Comesaña di que as súas medidas de carga laboral para que os PAC funcionen xa se cumpren

O conselleiro de Sanidade, Julio García Comesaña, asegurou este venres que as medidas excepcionais para garantir a cobertura de persoal nos Puntos de Atención Continuada (PAC) xa se están aplicando.

García Comesaña, sinalou que as gardas de substitución, que supón a inclusión de gardas localizadas --previamente comunicadas ás persoas-- para cubrir "ausencias imprevisibles" nos fins de semana ou festivos, xa se levan a cabo na área de Vigo.

En declaracións aos medios no Hospital Clínico de Santiago, o conselleiro avanzou que en Pontevedra "xa se lle ofreceu aos profesionais". "Se o aceptan, xa se poden incorporar", insistiu.

Estas gardas serían localizadas e retribuídas como tales, e no caso de mobilizarse para unha cobertura, será pagada como unha garda de presenza física, segundo se recolle na instrución final remitida por parte da Dirección Xeral de Recursos Humanos do Sergas aos profesionais.

Así mesmo, asegurou que outras medidas como que os médicos de urxencias hospitalarias da propia área ou doutra vaian a centros nos que non se poida cubrir aos profesionais que faltan, "xa se está facendo e en Pontevedra xa se fixo". Neste sentido, insistiu en que "se está recoñecendo". "Todas estas medidas poden usarse desde a semana pasada que se trasladaron", salientou.

Estas medidas están sendo duramente criticadas polos profesionais que as consideran abusivas e non solventan o problema de fondo. 

MIR DE 4º CURSO

Por outra banda, cuestionado sobre se os médicos internos residentes de cuarto curso poderían realizar gardas sós, Comesaña quixo matizar que iso "nunca se expuxo". En todo caso, si recoñeceu que, de estar só un médico acompañando ao residente, se este ten que desprazar sea algunha asistencia a un domicilio, cabe a posibilidade de que, ou ben acompañe ao médico de familia ou "quede só no PAC establecendo uns mecanismos para que cousas non podería atender".

Así, Comesaña manifestou que de non haber esta opción "sería peor que ese PAC quedase sen médico".