A Xunta insta o Goberno a actuar de "forma inmediata" para solucionar o parón de Ferroatlántica
Por E.P. | A CORUÑA | 02/08/2022 | Actualizada ás 16:16
O vicepresidente primeiro e conselleiro de Economía, Industria e Innovación, Francisco Conde, transmitiu ao Goberno central "a necesidade de actuar de forma inmediata" para solucionar a situación de Ferroatlántica.
A empresa, do grupo Ferroglobe, parou a súa produción do último do tres fornos que tiña en funcionamento en Sabón, no municipio de Arteixo, e avanzou a negociación dun ERTE como consecuencia do incremento do prezo enerxético.
Conde, ao mesmo tempo, instou á compañía a tomar medidas para "garantir un prezo estable no futuro". "Ten mecanismos para poder establecer contratos bilaterais que poidan abaratar o prezo enerxético", puntualizou.
O vicepresidente económico fixo estas declaracións este martes tras a reunión mantida co Comité de empresa na Delegación da Xunta na Coruña. "A reunión serviu para intercambiar información e sobre todo establecer cal é o camiño para traballar conxuntamente e atopar solucións", afirmou.
"SITUACIÓN LÍMITE"
O presidente do Comité de Ferroatlántica de Sabón, Armando Pratas, declarou tras a reunión que o conselleiro puxo "toda a súa dispoñibilidade para axudar e para falar coa empresa" así como "todos os medios que ten a Xunta para abaratar o prezo da enerxía".
"Non sei se se poderá evitar o ERTE", lamentou e afirmou que a empresa e "sobre todo" o Goberno teñen "moito que facer".
