Estabilizado o incendio forestal que calcinou seis hectáreas no barrio coruñés de Elviña
O Castro de Elviña "non está en perigo", segundo a alcaldesa.
Por Europa Press / Redacción | A Coruña | 04/08/2022 | Actualizada ás 12:50
O incendio forestal iniciado este mércores ás 19,41 horas no barrio de Elviña, unha das zonas rurais do Concello da Coruña, quedou estabilizado ás 01,27 horas da madrugada deste xoves tras queimar 6,06 hectáreas, segundo informaron fontes da Consellería do Medio Rural.
"Os efectivos están a facer lumes técnicos, contrafogos, para acabar de pechalo", detallaron as fontes, ademais de "refrescar a zona" para que "non haxa reproducións".
Pola súa banda, a alcaldesa da Coruña, Inés Rey, asegurou que o Castro de Elviña "non está en perigo" así como "ningunha zona habitada".
As primeiras estimacións provisionais apuntan a que das 6,06 hectáreas calcinadas, 3,56 corresponden a monte raso e 2,5, a zona arborada.
No control deste incendio traballaron un técnico, sete axentes, 12 brigadas, 10 motobombas e un helicóptero.
