Terceiro accidente dunha lancha contra unha batea nunha semana
Desta volta eran dez persoas as que ían na embarcación que chocou contra unha batea na ría de Pontevedra.
- Falece un home de 60 anos tras chocar unha lancha cunha batea na Illa de Arousa
- Unha embarcación queda enriba dunha batea tras chocar con ela
Por Europa Press / Redacción | VIGO | 05/08/2022 | Actualizada ás 11:33
Xa é o terceiro incidente deste tipo desde que hai pouco máis dunha semana un home de 60 anos morrera tras chocar cunha batea en Vilagarcía. Desta volta foi outra lancha de recreo con 10 persoas a bordo impactou contra unha batea na ría de Pontevedra na noite deste pasado xoves, segundo informaron fontes da Garda Civil a Europa Press.
En concreto, os feitos ocorreron sobre as 23,00 horas, momento no cal a embarcación pediu axuda a través dunha chamada aos servizos de emerxencia, debido a que chocara contra unha batea.
Así, o Servizo Marítimo da Garda Civil desprazouse ao lugar, un polígono de bateas próximo á localidade de Raxó. Unha vez alí, comprobou que na lancha había ata 10 persoas, todas elas ilesas.
Ademais, a embarcación non sufrira danos que non a permitisen continuar navegando, polo que a propia Benemérita acompañounos ata o seu porto base, en Portonovo, onde chegaron sen incidentes sobre as 23,50 horas.
As mesmas fontes indicaron que a néboa que había na zona a esas horas da noite puido ser unha das causas que provocaron que a embarcación acabase impactando contra a batea.
