Por Galicia Confidencial | Compostela | 11/09/2014 | Actualizada ás 21:16
'Galiza con Catalunya. Pola democracia e o dereito a decidir’. Ese foi o lema que presidiu a cadea humana en forma de V que se realizou diante da Catedral de Santiago, na Praza da Quintana, en solidariedade e apoio ao proceso de independencia aberto en Cataluña.
Os participantes, aredor dun cento, acudiron con bandeiras catalás e galegas e con faixas e camisolas de color vermello e amarelo –as cores da bandeira deste país-- para que a V tivera, precisamente, a cor da bandeira de Cataluña.
A iniciativa foi convocada pola plataforma ‘Galiza con Catalunya’, que apoia e respalda o proceso aberto en Cataluña para a celebración dun referendum sobre a súa independencia. Deste xeito, esta entidade quixo apoiar aos cataláns na celebración do seu día nacional, a Diada.
“Queremos transmitir a nosa solidariedade co pobo catalán e o noso apoio ante os problemas que interpón o Estado Español. En particular, manifestamos o noso apoio expreso á celebración da consulta de 9 de novembro e o noso rexeitamento á prohibición da voz do pobo”, recollía o manifesto da plataforma.
Precisamente, outra masiva manifestación, de case dous millóns de persoas, percorreu as rúas de Barcelona formando tamén unha V para reivindicar o dereito a votar o vindeiro 9 de novembro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.