O PPdeG acusa ao BNG de "facer política" co caso da muller falecida en Sanxenxo

O portavoz do grupo parlamentario do PPdeG, Pedro Puy, vinculou a petición do BNG de que compareza o presidente da Xunta, Alfonso Rueda, no Parlamento galego, polo caso da muller falecida na PAC de Baltar, en Sanxenxo, como un intento de "facer política cunha desgraza".

Fíxoo nunha rolda de prensa ofrecida no comezo do curso parlamentario. Nela, e a preguntas dos xornalistas, non concretou como será o posicionamento deste partido en relación a esta petición.

"O grupo situarase no seu momento, dirémolo cando se nos convoque na Deputación Permanente", expuxo Puy, para quen, no entanto, trátase "dunha forma de facer política pouco adecuada, pouco construtiva".

"Non é a forma máis correcta de facer política", engadiu tras pedir o BNG a comparecencia de Alfonso Rueda pola morte dunha muller na PAC de Baltar, en Sanxenxo, despois de solicitar o marido unha ambulancia e precisarlle desde o 061, segundo a súa denuncia, que se non tiña febre a desprazara el mesmo ao centro de saúde xa que non había unha ambulancia dispoñible nese momento.

Ante isto, e como resposta á petición da formación nacionalista, Puy lamentou que se tente "capitalizar politicamente unha desgraza". "Deberiamos ser respectuosos", recalcou.

"Fai entrever que non hai ninguén responsable de asumir un goberno cando se fai deses temas algo político que verdadeiramente non o é", dixo cuestionando a capacidade de gobernar dos nacionalistas.