Máis de 800 persoas sometéronse ao novo curso para porteiros da Xunta

A Xunta, a través da Academia Galega de Seguridade Pública (Agasp), convocou ao longo do ano pasado unha ducia de edicións do curso de formación de seis horas específico para o persoal de control de acceso de espectáculos públicos e de actividades recreativas que permitiu que 850 persoas obtivesen a habilitación administrativa para exercer estas funcións.

Segundo lembrou a Xunta, en marzo do ano pasado aprobouse o novo proxecto de decreto para o regulamento da actividade de control de acceso a espectáculos públicos e actividades recreativas, así como nos establecementos ou espazos públicos nos que leven a cabo e dispoñan deste servizo.

Ao amparo da nova norma, para obter a habilitación é necesario superar a formación específica convocada pola Agasp para os aspirantes que conten co certificado de aptitude psicolóxica. O actual decreto actualizou a normativa vixente desde 2010 e substituíu as anteriores probas anuais por un proceso máis curto a través dun curso de seis horas convocado pola Agasp que é necesario superar para adquirir a habilitación.

Para a admisión neste curso requírese ademais achegar un certificado de aptitude psicolóxica expedido por un centro médico-psicolóxico ou persoal autorizado xunto cun certificado de antecedentes penais. Esta mesma documentación tamén se ten que presentar no momento da renovación da habilitación, cuxa vixencia pasa no novo decreto de cinco a 10 anos.

Entre as funcións do persoal de acceso atópanse as de controlar a entrada das persoas ao establecemento ou espazo aberto ao público; comprobar a idade e identidade de quen pretenda acceder, en especial nos establecementos de xogo para acreditar que non figuran no rexistro de prohibicións; controlar a adquisición da entrada ou localidade; supervisar que non se exceda a capacidade máxima autorizada; impedir o acceso a persoas que incumpran as condicións específicas de admisión; vixiar que as bebidas non sexan sacadas do local; prohibir o acceso a partir do horario de peche, e mesmo, se fose necesario, auxiliar as persoas que se atopen feridas e chamar a emerxencias.