Por Europa Press / Redacción | SANTIAGO DE COMPOSTELA | 26/08/2022 | Actualizada ás 17:59
O conselleiro de Sanidade, Julio García Comesaña, negou que a morte dunha muller no punto de atención continuada (PAC) de Baltar, en Sanxenxo, sexa "un problema de recursos" e vinculou o sucedido con "a información que se traslada ao médico do 061 e a situación da paciente".
Fíxoo a preguntas dos xornalistas na Coruña e tras lamentar o falecemento da muller e trasladar o seu apoio á familia "nun momento tan complexo". No entanto, insistiu en que a falecida chegou ao centro de saúde nunha situación "que non se corresponde coa situación trasladada previamente", indicou Comesaña sobre a información achegada ao 061 na chamada inicial. Ademais, remitiuse á investigación por parte do xulgado.
MANIFESTACIÓN
En canto á protesta convocada este sábado en Sanxenxo, manifestou que "hai quen utiliza a sanidade para facer política de maneira permanente". "Isto é un novo exemplo", sentenciou.
Preguntado cando se poderán dar citas previas no centro de saúde de Baltar, explicou que de oito médicos hai tres e que, a petición destes, pediuse "adecuar a programación das citas e citar só as non demorables". Tamén dixo que a intención é que en setembro "todos os ocos de consulta programable poidan estar dispoñibles".
En canto ás demandas sindicais na área sanitaria de Pontevedra e O Salnés e as denuncias sobre falta de persoal, argumentou que están fixadas reunións e que o obxectivo é manter un "diálogo fluído" coa comisión de centro.
SITUACIÓN DA ATENCIÓN PRIMARIA
Por outra banda, cuestionado sobre a situación da Atención Primaria, insistiu en que é "complicada pola falta de profesionais", pero engadiu que a Xunta "no ámbito das súas competencias está a tomar medidas", entre as que citou a convocatoria de máis dun centenar de prazas por concurso de méritos para médicos de familia ou "liberar de carga de traballo menos médica" aos profesionais.
Con todo, volveu a demandar "a quen ten a chave", en referencia ao Executivo central, a toma de medidas para que se convoquen máis prazas MIR.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.