A Xunta reduce a protección de petroglifos para que ex-alcalde faga unha casa
O Goberno Galego tamén permite mover no mapa o xacemento prehistórico para que o ex-edil José Recuna poida construír unha vivenda unifamiliar na súa finca.
Por M.V. | Vilagarc´ía | 21/09/2014 | Actualizada ás 19:12
A Secretaría Xeral de Calidade e Avaliación Ambiental aprobou recentemente a "modificación puntual do Plan xeral de ordenación municipal para corrixir o ámbito de protección do xacemento arqueolóxico 4 PHA" en Vilagarcía. Na práctica, isto supón desprazar no plano Os Petroglifos dos Meadelos e abrir a porta a reducir o radio de protección ao redor do xacemento, até só dez metros.
A declaración é produto dunha solicitude do exalcalde socialista José Recuna Villaverde, segundo informou María López en Faro de Vigo. O primeiro edil de Vilagarcía na democracia pretende construír unha casa na finca na que estás os xacementos.
A polémica non xira en torno a reubicación no plano dos petroglifos, que semella están mal ubicados no catálogo oficial da Dirección Xeral de Patrimonio. O máis relevante é que a Xunta autoriza a posíbel redución do ámbeto de protección integral ao redor deles.
Os petroglifos están no centro da finca e a casa que pretende facer o ex-político non os afectaría directamente. Con todo, hoxe por hoxe a construcción sería ilegal porque afectaría ao perímetro de protección integral que especifica a Lei. Coa luz verde da Xunta, o Concello de Vilagarcía pode limitar ese perímetro, permitindo a construcción do inmóbel a só dez metros dos grabados.
O BNG local xa se pronunciou en contra. O concelleiro Xabier Ríos argumenta que ademais dos petroglifos localizados oficialmente hai máis xacementos na contorna, algúns a só 100 metros como Os Ballotes, polo que solicitará que se amplíe o perímetro de protección. Recentemente atopáronse novos xacementos moi próximos aos Ballotes e aos Meadelos.
Os petroglifos de Os Ballotes-Meadelos (no Salgueiral, Bamio, Vilagarcía) son un dos primeiros estudados polos historiadores do país. A principios do século XX tamén foron visitados polo investigador alemán Hugo Obermarier.
Así e todo, o principal argumento da Xunta para "posibilitar a construción dunha vivenda unifamiliar nas inmediacións do ámbito" debido a que os petroglifos "non son moi importantes debido a que posúen un único motivo cada unha delas e os gravados están bastante erosionados".
