Rueda acusa a PSOE e BNG de "catastrofistas" no inicio do curso político marcado pola crise

O curso político arrincou esta semana no Parlamento de Galicia coa celebración da primeira sesión de control ao presidente da Xunta, Alfonso Rueda, que acusou a socialistas e nacionalistas de manterse nunha actitude "tremendista" e "catastrofista", respectivamente, nun contexto de crise.

No caso do BNG, cuxa portavoz nacional se interesou polas medidas que se ían a implantar a raíz da alza de prezos e ante a situación de "deterioración" da sanidade pública; Rueda aproveitou as catro décadas da fundación da fronte nacionalista para dar o "parabén" á líder do Bloque con certo ton irónico, xa que engadiu que son "40 anos dicindo que non" e "moi enfadados" na oposición --só gobernaron entre 2005 e 2009 en coalición co PSdeG--.

Ao tempo, o mandatario autonómico subscribiu a comparecencia de inicio de curso escolar realizada este martes polo conselleiro de Educación, Román Rodríguez, e cuestionou a aplicación da Lomloe, xa que a Xunta ten pensado aplicala da forma "máis laxa" posible. Rueda argüiu, neste sentido, que "non só o PP" cre na "cultura do esforzo" e está en desacordo con "suprimir as notas numéricas" ou que se poida obter un título con suspensos.

Así as cousas, o mandatario galego usou a súa intervención coa intención de rebater as mensaxes "tremendistas" e "catastrofistas" da oposición argumentando que a Xunta puxo medidas encima da mesa para rebaixar a presión económica sobre as familias, como 26 millóns de euros en axudas para material escolar, as prazas subvencionadas nas escolas infantís --cun aforro duns 2.000 euros para as familias por neno--, o bono térmico ou a incorporación de máis vacinas ao calendario galego, neste caso como mellora sanitaria tamén.

O presidente da Xunta tamén volveu pedir o "apoio" para que se poidan incorporar máis médicos en formación --para paliar o déficit de facultativos de familia-- e defendeu que hai 14 profesores máis que o pasado ano ao comezo de curso --como xa explicara o conselleiro--. Ademais, avanzou a aprobación do Bono Activa Comercio e o impulso de 3.400 prazas máis de gardaría públicas.

PLENO POLÍTICA XERAL

Na contenda parlamentaria, a deputada nacionalista recriminoulle que acuda á Cámara galega a "facer de conselleiro de Facenda", en referencia que comparecerá para explicar as liñas mestras do orzamento autonómico, e pediulle que solicite a convocatoria dun debate sobre o estado da autonomía.

O debate de política xeral convócase con carácter anual, habitualmente no outono, e é 'tradicional' que se celebre a condición de que non sexa ano electoral e haxa sesión de investidura (nesta lexislatura houbo en xullo de 2020 e en maio de 2022 pola marcha de Alberto Núñez Feijóo).

Niso apoiouse Rueda para rexeitar a petición de Pontón e ironizar, ao tempo, sobre o seu coñecemento do regulamento parlamentario, un texto que tamén foi apelado polo portavoz socialista, Luís Álvarez, quen xustificou a pregunta sobre educación ao presidente na mesma sesión plenaria na que compareceu o conselleiro (as preguntas rexístranse antes de coñecer a orde do día e as comparecencias que introduce o goberno). "Primeiro de parlamentarismo", espetoulle o socialista ao mandatario galego.

Precisamente, a reincidencia de temática levou a Luís Álvarez na súa intervención a dirixirse varias veces ao conselleiro de Educación e tamén nomear ao presidente da Xunta co apelativo de conselleiro. Nunha delas, pediulle desculpas polo 'lapsus linguae': "A diferenza de vostedes, eu son humano e non divino e tamén me equivoco ás veces".

Rueda devolveulle o 'dardo' asegurando que, aínda que no PSdeG "cambien de portavoz cada seis meses", el si se acordaba de que Luís Álvarez é agora o representante na cámara autonómica. "Señor Rueda, non nos anuncie que quere vir facer de conselleiro de Facenda, exerza de presidente da Xunta, a poboación está a pasalo realmente mal. Galicia merece ter ese debate (de política xeral)", apelou Ana Pontón nunha proposta rexeitada polo dirixente autonómico, quen lle augurou que ela "nunca será presidenta" de Galicia.

LEA POR C TANGANA

Nesta primeira sesión, tamén houbo tempo para a lea á conta dos concertos patrocinados polo Xacobeo nun intercambio no que saíu a colación o período de vacacións estival. Así, Pontón tachou de "malgasto" de "2,5 millóns" achegado pola Xunta ao concerto de C. Tangana en Vigo e a "repartición de entradas VIP" nun palco (segundo o BNG, repartíronse 500 pases para unha zona separada de "mellor visibilidade") ao que foi o propio Rueda.

O presidente da Xunta, que afirmou que ao BNG lle "molesta o Xacobeo", que é "un éxito de Galicia", observou que Pontón non coñecía medidas do Goberno ante a crise de prezos porque estaba "de vacacións". "Que tal en Chile?", espetoulle. "Véxoo a vostede moi enfadado. Toda a vida receitando ao BNG que o nacionalismo se cura viaxando e agora critícamo", devolveulle Pontón, quen se preguntou se estaba "a facer prácticas" de oposición para a próxima lexislatura e quen lle pediu que cesase en "ataques persoais" á portavoz nacional do BNG.

Pontón acusouno de estar "desconectado dos problemas dos galegos", que o están "pasando canutas" --dixo noutro momento do debate--, mentres que Rueda contra replicou afirmando que a Pontón "lle vén especialmente ben" viaxar, posto que "o mundo non acaba no Padornelo". Así as cousas, o mandatario galego recriminoulle a Pontón que "siga disparando contra os servizos públicos" e recoñeceulle a "perseveranza" do BNG nos seus 40 anos, "repetindo as mesmas ladaíñas" e cun "discurso catastrofista sobre o futuro".

REPROCHES DO INICIO DE CURSO

Doutra banda, o portavoz do PSdeG na Cámara recriminou o "anuncio sen precedentes" do conselleiro de Educación sobre un inicio "caótico" no curso escolar, atribuído á aplicación da nova lei educativa. Neste sentido, o deputado socialista, que pediu que "cambie as condicións laborais" do profesorado, advertiu de que 10 das 17 comunidades autónomas publicaron os currículos antes do inicio de curso, incluída Madrid.

Ademais, tamén lle pediu que "reflexione" sobre a gratuidade dos libros de texto, que si se fai en Andalucía, e púxolle sobre a mesa os 26 millóns para axudas da Xunta fronte aos 60 millóns da Comunidade andaluza para a gratuidade total --con cinco e seis veces máis alumnado--. Así, o presidente galego, que sostivo que Álvarez ten "certa alerxia ao tremendismo" aínda que se saíu " do guión", destacou datos como un 8% de abandono escolar, coas mellores taxas de España. 

GALICIA PREPÁRASE PARA As "DIFICULTADES"

Ademais, o mandatario galego defendeu que Galicia se está "preparando para as dificultades", con outras axudas tamén como 50 millóns para comedores ou con 14 anos coas taxas universitarias máis baixas e conxeladas. "Teñen que cambiar a política educativa e non facer política coa educación", reclamou, pola súa banda, o socialista.

Co Goberno galego en pleno salvo a conselleira de Política Social, Fabiola García, de permiso pola súa segunda maternidade; a sesión deixou tamén algunha imaxe de recordo cunha foto de familia de boa parte dos deputados populares, a maioría da provincia de Pontevedra, que pousaron para unha instantánea xusto antes da chegada do presidente.

O presidente da Xunta, Alfonso Rueda, á súa chegada ao hemiciclo galego na sesión de control no Parlamento de Galicia. DAVID CABEZÓN @ XUNTA DE GALICIA | Fonte: Europa Press