O consultorio de Parga, en Guitiriz, recupera a súa actividade, suspendida por mor da pandemia

O Servizo Galego de Saúde (Sergas) retomará este mesmo mes de setembro a actividade asistencial, tanto de medicina de familia como de enfermaría, no consultorio de Parga, situado no concello de Guitiriz.

A actividade permanecía suspendida parcialmente desde o inicio da pandemia da covid-19, que obrigou a trasladar temporalmente parte das asistencias do consultorio de Parga ao centro de saúde de Guitiriz, co fin de garantir unha atención segura tanto aos pacientes como aos profesionais deste centro sanitario.

Unha vez chegada esta fase da pandemia, o Sergas, a través da xerencia da área sanitaria de Lugo, A Mariña e Monforte de Lemos, decidiu recuperar ao longo deste mes de setembro a actividade asistencial, tanto de enfermaría como de medicina de familia.

O consultorio de Parga contaba, aínda durante a pandemia, con atención de enfermaría, informou Sanidade. Con todo, a atención médica tivo que trasladarse temporalmente ao centro de saúde de Guitiriz, xa que o consultorio de Parga non reunía os requisitos establecidos no plan de continxencia para actuar contra a covid-19.

En concreto, a súa estrutura física e disposición arquitectónica non permitía manter as obrigadas distancias de seguridade e os circuítos de dobre circulación esixidos para loitar contra a propagación do virus.