Por Europa Press / Redacción | A CORUÑA | 20/09/2022 | Actualizada ás 13:43
Galicia rexistrou o verán "máis cálido" desde que hai rexistros, segundo datos achegados polo delegado da Axencia Estatal de Meteoroloxía (Aemet), Francisco Infante, no balance destes meses e a presentación da predición para os próximos. Sobre estes últimos, e de cara ao outono, apuntou, en canto ás temperaturas, que hai "unha maior probabilidade de que sexan máis altas do normal".
"Extremadamente cálido e lixeiramente seco", resumiu sobre o sucedido neste verán cun xuño "húmido", un xullo "moi seco" e un agosto "seco". "O verán máis cálido da serie de datos", dixo en referencia aos rexistros que se teñen. En concreto, sinalou que "desde 1961 xullo foi o máis cálido da serie histórica", mentres que no caso de agosto foi "o segundo máis cálido, despois de agosto de 2003".
Sobre as máximas, citou a rexistrada o 14 de xullo en Ourense con 44,1 graos, "en plena onda de calor", mentres que sobre a mínima aludiu á de Beariz, con 1,4 graos o 26 de xuño. Deste mes, resaltou tamén os "13 días de treboadas".
En canto a xullo, cualificouno de "rechamante". "Entre os días 12 e 14 de xullo houbo unha marca de temperaturas", explicou, aludindo ao caso de Ourense en canto ás máximas. Das mínimas, dixo tamén que foron "altas, moitas veces por enriba dos 20 graos, o que chamamos noites tropicais". Esta situación afectou tamén as zonas costeiras e en localidades como Pontevedra chegouse a rexistrar unha mínima de 24,9 graos.
DÉFICIT DE PRECIPITACIÓNS
Respecto das precipitacións, indicou que foi "moi seco" cunhas treboadas no sur e que se desprazaron ao norte, así como raios "que ocasionaron os grandes incendios en Galicia". Sobre agosto, cualificouno de "seco" e de "moi seco" na provincia de Pontevedra, mentres que definiu setembro como "máis cálido do normal" nos primeiros días.
Por outra banda, destacou que "o déficit de precipitacións acumulado é do 35%". "Un déficit importante", recoñeceu Infante, quen sinalou que debería chover "un 30% máis do que é habitual" para saír da seca. Para aliviala, indicou que chegaría con que chovese "o normal" en outubro e novembro. No entanto, preguntado se foi este o ano co maior número de meses con seca, precisou que houbo outro período de seca en 2017.
PREVISIÓNS
De cara a este fin de semana, avanzou que se espera a chegada dunha fronte "non moi activa" o venres e que se prevé "algunha choiva o fin de semana", aínda que non "moi importante". Isto irá acompañado dun descenso de temperaturas que será máis significativo a próxima semana.
Para os meses de outubro, novembro e decembro, apuntou, en canto ás temperaturas, que "a probabilidade é que sexan máis altas do normal" con precipitacións "por baixo do normal". "Probablemente se manteña a tendencia do verán", precisou Infante para quen, sobre as situacións de alerta polo consumo de auga, apuntou que "todo dependerá de como se comporte este trimestre".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.