Por Europa Press / Redacción | A CORUÑA | 23/09/2022 | Actualizada ás 11:56
O presidente da Xunta, Alfonso Rueda, anunciou que a Xunta ampliará a bonificación ao imposto de patrimonio, que pasará dun 25% ao 50% no orzamento de 2023, un anuncio que chega en pleno debate dentro do PP, cuxo líder, Feijóo, é partidario de suprimir este imposto que grava ás rentas máis altas. "Tomaremos decisións en materia fiscal", dixo sobre unhas contas centradas, avanzou, en "protexer a actividade empresarial e ás persoas". Ademais, destacou a fortaleza do país en materia enerxética xa que "exporta" enerxía eléctrica.
"Estamos a estudar outras medidas --en materia fiscal--, pero adianto que non subiremos impostos". "É moito mellor baixar impostos que subilos, non ten ningún sentido subilos", recalcou nun foro organizado por 'La Voz de Galicia' e no que pronunciou un relatorio sobre 'Competitividade e innovación para unha Galicia con máis certezas'.
"Estamos a acabar de terminar un orzamento serio ao que lle faltan variables importantes para acabar de pechalo", afirmou tamén en resposta ás demandas de información sobre o mesmo da oposición. Curiosamente, este xoves Rueda evitaba entrar nese debate e aseguraba non sentirse "presionado" por Feijóo.
ANA PONTÓN
Pola súa banda, a portavoz nacional do BNG, Ana Pontón, cualificou de "burla" e "pelotazo fiscal" a rebaixa do imposto de patrimonio en Galicia e acusou a Rueda de estar "ao servizo" da dirección do seu partido en Madrid e de gobernar "para unha minoría".
"É unha burla que Rueda decida baixarlle os impostos aos 7.000 millonarios mentres as familias, a clase traballadora, as persoas autónomas non chegan a fin de mes", aseverou a líder nacionalista en declaracións difundidas aos medios tras coñecerse o anuncio do mandatario autonómico.
FORMOSO
O secretario xeral do PSdeG, Valentín González Formoso, cualificou de "decepcionante" comprobar que "a primeira medida fiscal" que adopta o presidente da Xunta, Alfonso Rueda, "ten que ver con beneficiar aos máis ricos".
"Estamos a falar de que lle vai a baixar os impostos ao 0,02% da poboación galega, mentres o 99% seguen esperando que esa rebaixa de impostos chegue no seu tramo de IRPF correspondente", declarou o secretario xeral dos socialistas galegos.
Así mesmo, engadiu que a cidadanía quere unha "política fiscal seria, pensada por e para Galicia e non para Génova e para os intereses dos baróns do PP".
"Galicia non debe estar supeditada ao criterio da presidenta da Comunidade de Madrid nin á Comunidade de Andalucía", puntualizou.
DESCENTRALIZAR OS FONDOS EUROPEOS
Na súa intervención, Rueda volveu a criticar a execución dos fondos europeos por parte do Executivo central. "A día de hoxe está a espertar máis incertezas que seguridades", manifestou tras rexeitar a xestión "centralizada" dos mesmos que, ao seu xuízo, está a supor, entre outras cuestións, "a incapacidade recoñecida para facer chegar os fondos ás pemes".
TRANSICIÓN ENERXÉTICA
No seu discurso, defendeu, sobre a situación económica, que "Galicia aprendeu a exportar en tempos complicados" e citou, en materia enerxética, que "o 74% da enerxía eléctrica que se produce en Galicia é de renovables, ese obxectivo está marcado na UE para o 2030".
VETO Á PESCA
Mentres, volveu a rexeitar un "ecoloxismo mal entendido" en alusión ao veto á pesca de fondo en 87 áreas do Atlántico. Unha medida, engadiu, que "condena á ruína" ao sector. "A Xunta está a tentar defender os intereses da xente", engadiu pedindo ao Executivo central que recorre o veto de Bruxelas. "Entendo que hai que preparalo ben, ofrecemos toda a nosa axuda", apostilou.
ESCOTET APELA Á INNOVACIÓN
Antes interveu o presidente de Abanca, Juan Carlos Escotet, quen apelou á "innovación" das empresas como "o factor diferenciador, que permite dar un salto cualitativo". Tamén aludiu aos retos existntes, entre os que citou o cambio climático, a aceleración tecnolóxica ou a procura da estabilidade dos mercados. "Galicia ten no conxunto de España unha especial solidez, un camiño percorrido e capacidade para sacar o mellor proveito dos fondos europeos e proxectarse como unha economía líder".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.