Por E.P. | OURENSE | 25/09/2022 | Actualizada ás 20:00
A Deputación de Ourense lamentou o falecemento este sábado aos 97 anos de idade de Elixio Rivas, "persoa clave da filoloxía e a etnografía galega e unha figura fundamental da provincia".
Nun comunicado, o presidente provincial, Manuel Baltar, expresou as súas condolencias polo falecemento dunha persoa que axudou á provincia á "súa propia autocomprensión grazas a unha vida dedicada á investigación". Así, Baltar recoñeceu as achegas dun home "tan valioso polo seu coñecemento como pola súa profunda dimensión humana".
Elixio Rivas foi distinguido coa Medalla de Ouro da provincia en 2019 como recoñecemento a "unha traxectoria exemplar, con fitos como as súas amplísimas investigacións sobre o léxico rural do noroeste peninsular ou o seu libro 'A Limia'". "Unha homenaxe a unha forma de ser e de sentir o noso, de divulgar os mellores valores que nos singularizan como pobo e como país", referendara Baltar no acto de entrega da medalla, o 1 de abril de 2019.
Rivas tamén foi recoñecido con premios como a Medalla Castelao da Xunta de Galicia. Entre as súas obras e proxectos destacan a restauración da ermida de San Mamede; a creación da aula da Natureza no Caudillo; os traballos a favor da restauración do Camiño Mozárabe de Santiago; ou a creación e restauración das pezas do Museo Etnográfico situado en Montemedo, Os Milagres.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.