Por E.P. | Santiago de Compostela | 03/10/2022 | Actualizada ás 15:34
O alcalde de Santiago, Xosé Sánchez Bugallo, presentou este luns en rolda de prensa o anteproxecto de humanización da rúa do Restollal, co que se pretende converter esta estrada de acceso á cidade nun espazo "amable" para vehículos e peóns, facilitando tamén a conectividade entre os barrios.
Acompañouno na súa intervención ante os medios Antonio Ranedo, xefe do Servizo de Obras, quen explicou o detalle do proxecto polo que o goberno local pedirá ao Ministerio de Transportes unha subvención de máis de 4,5 millóns de euros, dun proxecto cuxo custo superaría os 6 millóns.
En concreto, a xunta de goberno local, reunida o pasado xoves en sesión extraordinaria, deu luz verde á solicitude por parte do Concello de Santiago dunha axuda con cargo ao 'Programa de Axudas a Municipios para a Implantación de Zonas de Baixas Emisións e a Transformación Dixital e Sustentable do Transporte Urbano', financiado polo Ministerio de Transportes, Mobilidade e Axenda Urbana a través do Plan de Recuperación, Transformación e Resilencia.
O alcalde explicou este luns que o orzamento do anteproxecto de humanización do Restollal ascende a 6.179.350 euros, dos que se pedirá que se subvencionen 4.596.210,00 euros, polo que os 1.583.140 euros restantes irían con cargo aos fondos municipais.
Tamén concretou que as actuacións cubrirán "desde o inicio da Rúa Amor Ruibal pasando pola Rúa Restollal, ata chegar á glorieta do Castiñeiriño que comunica coa estrada SC-11", e suporán "unha reordenación total desta zona, xa que converterá a estrada N-525 nunha vía urbana máis amable para toda a veciñanza", que, ademais, permitirá conectar "o barrio de Pontepedriña coas futuras urbanizacións da zona do Castiñeiriño".
O rexedor indicou que, unha vez confírmese a subvención nas próxima semanas, arrincarase o proceso de licitación, xa que as obras deben estar adxudicadas antes de finais de marzo de 2024 para poder levar a cabo a súa execución nos anos 2025 e 2026.
A intervención abarcará un total de 42.000 m2 e executarase en tres fases, atendendo aos distintos tecidos que configuran a trama urbana.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.