Por Europa Press / Redacción | SANTIAGO DE COMPOSTELA | 05/10/2022 | Actualizada ás 10:40
A Consellería de Sanidade informou este mércores de dous novos falecidos pola pandemia de covid-19, nunha xornada na que volveron a repuntar casos activos e positivos, aínda que se rexistra un descenso nos hospitalizados.
En concreto, as últimas mortes comunicadas coa dunha muller de 93 anos na área sanitaria da Coruña e Cee e a dun home de 95 na área sanitaria de Ourense, Verín e O Barco, co que a cifra total de falecidos ascende a 3.916.
Segundo o último parte publicado, con datos recolleitos ata as 18,00 horas deste martes, hai en Galicia 1.364 casos activos --31 máis que 24 horas antes-- e detectáronse 173 positivos nunha xornada, 15 máis que nas 24 horas anteriores. Fronte a estes datos en alza, o número de hospitalizados experimentou un lixeiro descenso, cun paciente menos en hospitalización --105-- e outro menos en UCI --4--.
Por áreas sanitarias, a da Coruña e Cee é a que experimenta un maior descenso no número de hospitalizados, que son 35 en planta e un en UCI. Tamén baixa Santiago, con 12 pacientes en hospitalización convencional e ningún en coidados intensivos, e mantéñense igual Lugo --10 enfermos en planta-- e Ferrol --catro--.
As alzas, aínda que lixeiras, son nas áreas de Ourense --16 pacientes en planta e un en UCI--, Vigo --15 en planta e dous en coidados intensivos-- e Pontevedra --13 pacientes en planta--.
CASOS ACTIVOS E POSITIVOS
En canto aos casos activos por área sanitaria, todas experimentan un incremento fóra de Pontevedra, que baixa lixeiramente e sitúase en 141 casos activos e 18 contaxios novos.
Pola súa banda, a área con máis casos activos segue sendo a da Coruña, con 297 e 36 positivos; seguida da de Ourense, con 226 activos e 41 casos novos; Santiago, con 223 casos e 18 positivos; e Vigo, con 209 casos e 23 positivos.
Por baixo dos 200 casos activos están Lugo --167 e 22 positivos-- e Ferrol, que pasa do centenar, ata os 101, tras detectar 15 novos contaxios.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.