Por Europa Press / Redacción | SANTIAGO DE COMPOSTELA | 06/10/2022 | Actualizada ás 10:44
O maquinista do Alvia, Francisco Garzón, relatou ante a xuíza Elena Fernández Currás como viviu o accidente do 24 de xullo de 2013 no barrio compostelán de Angrois, o seu ingreso no hospital e o seu paso polo calabozo. En concreto sobre a seguridade na vía, asegurou que "non había ningún tipo de sinal ata a curva". "Nada, de nada, de nada", salientou. Remarcouno durante a súa declaración no xuízo polo sinistro, que durou exactamente unha hora, e na que só respondeu ás preguntas do seu avogado.
"É criminal que me saquen do hospital con tres costelas rotas. E puxéronme un tubo para quitarme o sangue na pleura", dixo, ao referirse á súa alta e posterior apresamento, para explicar que "de ningún xeito" estaba en condicións de prestar declaración.
O letrado conduciu o interrogatorio sobre a súa vida profesional en Renfe desde que ingresou no ano 1982 --obtivo o título de maquinista en abril de 2013-- e ata o día do accidente. O primeiro momento no que se lle rompeu a voz foi para falar dos primeiros segundos tras o descarrilamento do Alvia na curva da Grandeira.
"O primeiro era atender os viaxeiros e socorrelos", dixo, de maneira entrecortada, despois de que fose o seu avogado quen contou como, co accidente, quedou atrapado entre os ferros da locomotora e pse puxo en contacto co posto de mando de Renfe en Atocha (Madrid). Ao preguntarlle o seu avogado sobre a súa condución ao hospital de Santiago, houbo unha primeira pausa na súa declaración na que pediu "perdón" ata tres veces. Nese momento, a xuíza interveu por primeira vez para pedirlle que estivese "tranquilo", ao que o maquinista respondeu: "Xa, pero é imposible".
"Reitérome en que as vítimas me perdoen. Pero foi un accidente, non puiden evitalo", asegurou. O letrado destacou que foi "público e notorio" que o maquinista pediu perdón en varias ocasións, mesmo a través dunha carta que recolleu a prensa. O presidente da Plataforma de Vítimas Alvia 04155, Jesús Domínguez, valorou que o maquinista "unha vez máis" pedise desculpas na súa declaración. "Nós somos un colectivo con todo tipo de sensibilidades. Haberá xente que o perdoe e haberá xente que non, é un tema que eu non podo valorar", recoñeceu Domínguez.
AS LESIÓNS NON LLE DEIXABAN "TOMBARSE"
Tal e como relatou o seu avogado defensor, as lesións sufridas no accidente non lle permitían "tombarse". A pesar diso, o 27 de xullo --tres días despois do accidente-- recibiu a alta e foi conducido ao calabozo, onde sentou "no chan" porque só tiña "un catre", segundo contou Prieto. "Solicitei unha cadeira e negáronma", confirmou Garzón.
O maquinista e o letrado tamén deslizaron que a súa alta hospitalaria e a súa detención gardaba relación coa rolda de prensa que deu ao día seguinte --28 de xullo-- o ministro do Interior, Jorge Fernández Díaz. Con todo, a xuíza matizou que "o ministro non detén a ninguén" e que se fora levado a calabozo era "por ordes do xuíz instrutor".
Nese momento, Garzón tachou de "criminal" que saíse do hospital "con tres costelas rotas" e a xuíza advertiulle que ese non era "o obxectivo do xuízo". "Se vostede ten algunha queixa dos servizos médicos que lle deron a alta pode presentar unha queixa no foro (pertinente)", engadiu. Fernández Curras tamén lle advertiu de que estaba "a deixar en mal lugar aos médicos", algo que o maquinista se apresurou a negar: "Non, non. Se se entendeu iso, pido perdón aos médicos".
POSPOSTA DECLARACIÓN DO EX ALTO CARGO DE ADIF
A declaración do ex alto cargo de Adif Andrés Cortabitarte pospúxose ata o vindeiro xoves 13 para que "poida reporse" tras o "incidente" rexistrado na xornada de arranque do xuízo. Así o comunicou a xuíza Elena Fernández Currás ao termo da declaración do maquinista. O calendario previsto polo tribunal reservaba tanto o resto deste xoves como o venres para a comparecencia de Cortabitarte, pero o seu avogado asegurou á xuíza que "aínda segue afectado polo que sucedeu onte".
En concreto, o pai dunha moza falecida no sinistro ferroviario propinoulle un golpe á saída do edificio xudicial ao acabar as cuestións previas. "Pedimos que poida declarar a próxima semana", dixo o letrado do exdirectivo ao que se imputan 80 supostos homicidios e 145 delitos de lesións por imprudencia profesional grave, xa que era o encargado de velar pola seguridade na vía.
Ante isto, a titular do xulgado do penal número 2 de Santiago sinalou que "todos" son "coñecedores do incidente" que se viviu o mércores. Tendo en conta que a declaración de Cortabitarte será "notablemente máis longa" e tras manifestar a súa defensa que "non se atopa en condicións por ese incidente, engadido á propia tensión" por atoparse como acusado na causa, segundo sinalou a propia xuíza, esta decidiu aprazar a súa comparecencia, xa que "existen días máis que suficientes" e para que "poida reporse".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.