Hipra espera poder comercializar a súa vacina antes de acabar o ano

Hipra presentará antes de que acabe o mes os últimos datos que a Axencia Europea do Medicamento (EMA) solicitou para concluír a súa avaliación da vacina contra a COVID-19 producida polo laboratorio español, polo que espera recibir luz verde para o seu rexistro e comercialización en novembro e poder distribuír as primeiras doses aos Estados membro antes de que acabe o ano.

"A data depende do que diga a EMA; pero esperamos e confiamos ter a autorización en novembro e que a vacina poida ser parte da campaña de vacinación antes de fin de ano tanto en España como no resto da Unión Europea", indicou a vicepresidenta executiva da empresa Elia Torroella, nun encontro con xornalistas en Bruxelas.

A Comisión Europea pechou o pasado agosto un acordo de compra conxunta con Hipra para asegurar a subministración de 240 millóns de doses da súa vacinaa proteica á Unión Europea, un convenio polo que xa mostraron interese 14 Estados membro, entre eles España, Francia ou Austria, e que prevé un prezo por dose "por baixo dos 10 euros", segundo detallou o tamén vicepresidente executivo da compañía Carlos Montañés.

A EMA examina o soro de Hipra como unha vacina de reforzo para administrar a partir dos 16 anos, pero a farmacéutica espera empezar con ensaios pediátricos unha vez conte coa autorización de comercialización na Unión Europea para poder ampliar o rango de aplicación.