O Concello de Pontevedra di que o seu contrato de lixo é "pioneiro" e será "decisivo" na loita contra o cambio climático

A xunta de goberno do Concello de Pontevedra aprobou este martes do expediente de contratación da xestión de residuos, que será remitido á Oficina Nacional de Avaliación (ONE), organismo do Ministerio de Facenda que analiza a sustentabilidade económica dos contratos.

Así o explicou o concelleiro de Residuos, Raimundo González, nunha rolda de prensa para ofrecer as novidades ao redor do futuro novo contrato do lixo da cidade. A semana pasada, o goberno local acordara 'resetear' o contrato en vigor.

Ademais, a reunión deste martes permitiu acordar que se publique na plataforma dixital o novo plan económico financeiro e os novos pregos técnicos e administrativos "para que teñan acceso a eles todos os operadores que se queiran presentar a este contrato no futuro".

Deste xeito, tan só restarían o citado informe da ONE e o de fiscalización, "nada máis", aclarou o edil. E, aínda que non é vinculante, o concelleiro nacionalista confía que a resolución do Estado sexa positiva, xa que "contempla as suxestións realizadas no primeiro informe, ao coincidir agora o prazo de recuperación de investimento de 20 anos co da duración do contrato".

O edil lembrou que, co novo estudo económico, o contrato pasa dun orzamento de 10.702.000 euros, a un de 11.670.000 euros. "É o maior contrato do Concello de Pontevedra, con diferenza, que utiliza case un 15 por cento dos recursos ordinarios", aseverou.

Así mesmo, González destacou que "é un contrato pioneiro, que aposta pola economía circular e que probablemente nos leve a ser o primeiro Concello que saque un contrato de residuos adaptado á nova lei de residuos e chans contaminados"."Non só iso, senón que traerá uns cambios substanciais e notables no día a día, como deixar de considerar os residuos refugallos, para pasar a ser un recurso", engadiu. Este cambio de concepción, segundo o concelleiro, "vai ter unha implicación decisiva e substancial na loita contra o cambio climático".

Colectores sobordan de lixo no barrio de Monte Alto da Coruña pola falta do servizo de recollida de lixo tras a terceira madrugada de incidentes polo conflito do lixo, a 25 de febreiro de 2022 | Fonte: M. Dylan - Europa Press.