Por E.P. | SANTIAGO DE COMPOSTELA | 12/10/2022 | Actualizada ás 13:12
O portavoz de Sanidade do Grupo Socialista, Julio Torrado, presentou unha batería de iniciativas parlamentarias para reclamarlle á Xunta que incorpore máis centros de vacinación para fornecer a cuarta dose da covid e reforce o persoal sanitario co fin de "achegar a vacina ás persoas maiores".
Así, o responsable socialista acusa o goberno galego de apostar por un sistema "confuso", que está a xerar problemas nas persoas que queren vacinarse, e esixiu ao Sergas que "rectifique e abra a vacinación nos centros máis próximos á cidadanía", os centros de saúde, tal e como se fixo en anteriores campañas.
Torrado acudiu aos datos facilitados por Sanidade para argumentar que, despois de máis de dúas semanas vacinando á poboación de máis de 85 anos, "aínda están sen recibir a súa dose 6 de cada 10 galegos desta franxa de idade", o que considera "un fracaso".
O responsable socialista destaca tamén "as numerosas queixas sobre as dificultades" que está a xerar este proceso, ao "obrigar a algunhas persoas de máis de 85 anos a realizar longos desprazamentos polos seus propios medios". "Da Fonsagrada a Lugo, de Entrimo a Ourense ou de Lalín a Santiago son desprazamentos que están a ser asumidos polas persoas maiores, coas dificultades que iso supón, e existindo centros sanitarios máis próximos", engadiu.
Por iso, o Grupo Socialista reclama a "mellora do deseño inicial" proposto polo Sergas, abrindo a posibilidade da contratación extraordinaria dos profesionais sanitarios necesarios "para poder ampliar o volume de centros de vacinación dispoñibles en Galicia".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.