A Xunta aproba incentivos para contratos de menores de 30 anos formados no sistema de garantía xuvenil
Farase a través dunha liña de 6.000 euros por contrato formalizado.
Por E.P. | SANTIAGO DE COMPOSTELA | 13/10/2022 | Actualizada ás 19:39
O Goberno galego prevé pór en marcha unha nova liña de incentivos de 6.000 euros por contrato formalizado a menores de 30 anos, unhas axudas coas que a Consellería de Promoción do Emprego e Igualdade aspira a impulsar a incorporación ao mercado de traballo de persoas novas inscritas no sistema de garantía xuvenil que participasen en programas de formación entre os anos 2020 e 2021.
Empresas, centros especiais de emprego e persoas traballadoras autónomas pódense beneficiar destas axudas que se publicarán este venres no Diario Oficial de Galicia (DOG). Así, os interesados en optar a estes incentivos poderán solicitalos ata o día 15 de novembro.
Os contratos subvencionables deberán formalizarse con mozos menores de 30 que finalizasen o seu programa de formación para o emprego nos anos 2020 e 2021, e que consten inscritos no sistema de garantía xuvenil.
Ademais, terán que estar desempregados e inscritos como demandantes do Servizo de Emprego de Galicia.
300 BENEFICIARIOS
A Consellería de Promoción do Emprego calcula que se poderán beneficiar destes apoios uns 300 mozos. As achegas realizaranse nun único pago de 6.000 euros pola presentación do contrato, que debe ter unha extensión mínima de 6 meses e con xornada a tempo completo.
A orde prevé un investimento de máis de 1,7 millóns de euros, que se financiarán con cargo ao Fondo Social Europeo (FSE).
