Dirixentes do PP de Lugo imputados por carretar a enfermos de Alzheimer
Un xulgado de Lugo chama a declarar este mércores aos acusados dun presunto delito electoral ao entender o xuíz que poden existir “indicios racionais de criminalidade” na carretaxe de anciás con demencia senil.
Por Galicia Confidencial | Compostela | 15/10/2014 | Actualizada ás 08:00
José Luis Iravedra Lestral, membro do Executiva Provincial do Partido Popular, conselleiro da RTVG, ex tesoreiro do PPdeG e considerado como o número dous do PP en Lugo durante a etapa de Francisco Cacharro coma presidente provincial, terá que declarar ante un xuíz imputado por un presunto delito eletoral de carretaxe de votos.
Xunto a el tamén están imputados Teresa Taboada Candal, ex concelleira do PPdeG e Benigno Gómez Abel e Serafín Rodríguez Rodríguez. Os tres deberán comparecer este mércoeres ante o Xulgado número 2 de instrucción de Lugo para dar conta do carrexo de varias persoas nas pasadas eleccións autonómicas de 2012.
Nun auto, o xuíz suliña que estes dirixentes populares puideron incorrer nun presunto delito electoral, “consistente en utilización de persoas cuxas facultades intelectivas e volitivas estaban afectadas, polos padecementos que obran nos informes forenses emitidos por IMELGA (demencia senil, Alzheimer etc)”. Estas persoas serían trasladándoas á mesa electoral para depositar o voto, “a pesar de que tales persoas carecían de capacidade para comprender e decidir o sentido do seu voto”.
Tras unha denuncia de Alternativa Galega de Esquerda (AGE), o xuíz ordenou á Policía Xudicial que practicara as dilixencias necesarias encamiñadas a determinar “a natureza e circunstancias do feito, as persoas que nel participaron e o órgano competente para o axuizamento”. Tras estas pescudas, o xuíz entende que pode “existir indicios racionais de criminalidade dos mesmos”.
Entre a información aportada por AGE, había fotos publicada en diversos medios nas que se aludía á denuncia. Nesas instantáneas aparecían as catro persoas chamadas a declarar. Os investigadores tomaron tamén declaración ás testemuñas presenciais e, finalmente, foron identificados os anciáns do Asilo de San Roque de Lugo que votaron co suposto apoio de dirixentes populares.
O xuíz ordenou emitir un informe forense respecto das “capacidades intelectivas e volitivas” destes anciáns, que sofren doenzas como demencia senil ou Alzheimer.
