A Xunta decidirá en agosto sobre os concertos con centros que segregan por sexo en base ao "marco legal"

O conselleiro de Cultura, Educación e Universidades, Román Rodríguez, defendeu este mércores no Parlamento que os concertos con centros educativos que segregan por sexo están amparados pola legalidade vixente e explicou que a Xunta decidirá sobre a súa renovación en base ao "marco legal" que haxa cando se produza este proceso, en agosto de 2023.

Así o dixo en resposta a unha interpelación formulada polo deputado nacionalista Manuel Lourenzo, na que vinculou a actuación da Xunta ao marco legal existente.

Neste sentido, o conselleiro lembrou que a nova lei educativa, a Lomloe, inclúe a prohibición de subvencionar centros que segregan por sexo aos seus alumnos, aínda que este artigo "está recorrido" ante o Tribunal Constitucional, que será "o que terá que fixar" a doutrina.

Paralelamente, Román Rodríguez sinalou que os concertos actualmente en vigor decaen en agosto de 2023 e, dixo, "non se poden modificar a metade de partido". Por iso, sobre se a Xunta renovaraos ou non, instou a esperar a coñecer cal será o marco legal entón.

"Naquel momento teremos que ver cal é o marco legal para, en base a el, tomar as decisións que teñamos que tomar", dixo o conselleiro, que cinguiu a posición da Xunta a "a legalidade" vixente.

A "LIBERDADE DAS FAMILIAS"

Na súa intervención, Román Rodríguez asegurou que se trata dun "debate moi interesante" que "contrapón dous modelos diferenciados" de educación, amparados "pola liberdade e polo respecto" e que obedecen a "as decisións individuais das familias".

Rodríguez criticou que a cuestión sexa "ideolóxica" para o BNG e defendeu "a liberdade das familias á hora de elixir centros educativos".

A maiores, reiterou que se cumpre coa lexislación vixente e lembrou que este modelo "existe na rede pública de países tan democráticos como Reino Unido ou Estados Unidos".

UN "TIPO DE DISCRIMINACIÓN"

Na súa pregunta, o deputado nacionalista Manuel Lourenzo cualificou este modelo educativo como "un tipo de discriminación" e fixo un símil ás escolas que, no seu día, separaban a nenos por razón de raza.

A maiores, Lourenzo explicou que "é falso que mellore a educación" e dixo que "non existe ningún argumento que poida defender que este modelo educativo é beneficioso", polo que preguntou "como é posible que, a estas alturas, o Goberno siga mantendo estes concertos".

Para o BNG, existe "un interese do PP" por "beneficiar a certos centros cos que ten conivencia ideolóxica", dixo Lourenzo, que considera a educación segregada algo "machista", "clasista" e "elitista".

A continuación, e despois de que o conselleiro apelase á "liberdade das familias" para elixir o modelo educativo, Lourenzo volveu a equiparar esta situación con outras discriminacións. "Existe liberdade nas familias para dicir que non queren que un neno negro entre nunha escola para brancos? Ou para decidir que queren que o seu fillo estude nun colexio só para heterosexuais?", sinalou Lourenzo, que cuestionou por que si se dá a posibilidade de "prohibir que unha nena entre nun centro para nenos".

O conselleiro de Cultura, Educación, FP e Universidades, Román Rodríguez, comparece no pleno do Parlamento de Galicia.. XUNTA